Quetta mein fIPV insdad Polio muhim ka chhata roz: Deputy Commissioner Mehrullah Badini ki zer-e-sadarat evening review ijlas

Quetta: Fractional IPV (fIPV) insdad Polio muhim ke chhate roz ka evening review ijlas Deputy Commissioner Quetta Mehrullah Badini ki sadarat mein munaqid hua, jis mein National EOC, mahkama Sehat, WHO, UNICEF, zilai intizamia, District Monitors aur deegar mutalliqa afsaran ne shirkat ki.

Ijlas mein zila bhar mein jari Polio muhim ki majmui pesh raft ka jaiza liya gaya. Human resource ki taenati, OPV aur fIPV coverage, union council war karkardagi, refusals, miss shuda bachchon, RCA nataij aur field monitors ki reports par tafseeli briefing di gayi.

Deputy Commissioner Mehrullah Badini ne hidayat ki ke jin ilaqon mein coverage kam rahi ya refusal aur miss shuda bachchon ke cases samne aaye hain, wahan fori iqdamat karte hue har bachche tak Polio vaccine ki rasai yaqeeni banayi jaye.

Unhon ne Assistant Commissioners, mahkama Sehat aur Polio partners ko hidayat ki ke field monitoring mazeed muassir banayi jaye, teamon ki karkardagi par musalsal nazar rakhi jaye aur muhim ke muqarrara ahdaf har soorat hasil kiye jayen.

Deputy Commissioner ne kaha ke Polio ka mukammal khatma hum sab ki mushtarka zimmedari hai, aur zilai intizamia is qaumi maqsad ke husool ke liye tamam mutalliqa idaron ke sath bharpoor taawun jari rakhegi.

Tasveer: bashukriya DG PR Balochistan