European Union ke satellite mansoobe ki manzoori ke liye sharakat daron se muzakrat jari

Brussels: European Union amriki satellite company SpaceX par inhisar kam karne ke liye apne satellite mansoobe ki musabiqati qawaneen ke tahat jald manzoori hasil karne ke liye sharakat dar idaron Leonardo SpA, Airbus SE aur Thales SA ke sath muzakrat kar rahi hai.

Alami media report ke mutabiq Bloomberg ne is mamle se agah ek ohdedar ke hawale se bataya hai ke is mansoobe ko European Union ki janib se SpaceX ke mutabadil ke taur par dekha ja raha hai.

Report ke mutabiq guzishta ek saal ke douran hone wale muzakrat mein mansoobe se mutaliq musabiqati khadshat ki nishandahi aur unhein door karne par tawajjoh markooz ki gayi, taake manzoori ke liye bazabta darkhwast dene se qabl mumkina masail hal kiye ja sakein.

Ohdedar ne bataya ke mutaliqa companiyon ne tahal darkhwast jama nahin karayi, taham European Union ke hukkam ko tawaqqo hai ke woh aainda chand hafton mein aisa kar dengi.

“Project Bromo” ke naam se maroof is mansoobe ko European Commission ki sadr Ursula von der Leyen ne ek mumkina European champion qarar diya hai. Mansoobe ka maqsad aisi company qayam karna hai jo Europe ko Elon Musk ki SpaceX samet amriki satellite faraham karne wale idaron par inhisar kam karne mein madad de sake.