Food Panda ka delivery riders ki hifazat ke liye telematics par mabni hifazati nizam mutaarif karane ka elaan

Karachi: Food Panda ne delivery riders ki hifazat behtar banane ke liye apni mobile app mein jadeed telematics Technology par mabni hifazati sahulat mutaarif kara di hai.

Aalami satah par insani rawaiyon ka tajziya karne wali Technology faraham karne wale idare Sentience ke ishtirak se tayyar kardah yeh nizam riders ko apne driving ke andaz ko samajhne, zaati nauiyat ki hifazati maloomat hasil karne aur mohtat driving ke liye rehnumai faraham karega.

Nizam kaise kaam karega

Sentience ka mobile software Food Panda ki rider app mein shamil kiya gaya hai. Yeh nizam smartphone ke harkati sensors, jin mein maqam maloom karne ka nizam, accelerometer aur gyroscope shamil hain, se hasil hone wale aadad o shumar ko mobile phone par hi process karta hai.

Riders app mein mojood khusoosi hifazati markaz ke zariye apni driving se mutaalliq tajziyati maloomat dekh sakenge. In mein mehfooz safar ki zaati sharah aur hifazati sifarishat shamil hain.

In ka maqsad mohtat driving ki hausla afzai, sarkon par hadsat ke khatraat mein kami aur tawil muddat mein delivery amle ki hifazat behtar banana hai.

Food Panda Pakistan ke director logistics Ahsan Malik ne kaha ke delivery partners ki jismani hifazat aur falah o bahbood idare ki awwaleen tarjeehat mein shamil hai.

Un ke mutabiq Sentience ki Technology ko rider app mein shamil karne se rozmarra istemal hone wale smartphones ko hifazati moawin zaraye mein tabdeel kiya ja raha hai, jis se riders ko apni driving behtar banane aur sarak par zyada mehfooz rehne mein madad milegi.