Dera Bugti: Chief Minister Sarfraz Bugti ki musalsal teesre roz Khuli Kachehri, masail ke fori hal ki hidayat

Shumali Dera Bugti: Chief Minister Balochistan Mir Sarfraz Bugti ne musalsal teesre roz Khuli Kachehri ka inaqad kiya, jahan mukhtalif Azla se aane wale shehriyon ke masail barah-e-raast sune gaye. Unhon ne mutalliqa hukkam ko un ke fori hal ke liye zaroori iqdamat uthane ki hidayat jari kin.

Is mauqe par Chief Minister ne qabaili umaidin se bhi mulaqat ki aur ilaqe ke masail, taraqqiyati zaruriyat aur awam ko darpesh mushkilat par tabadla-e-khayal kiya.

Mir Sarfraz Bugti ne kaha ke awami masail ka hal aur bunyadi sahuliyat ki faraahmi hukumat ki tarjihat mein shamil hain. Khuli Kachehriyon ka maqsad awam ko apni shikayat barah-e-raast hukumati qayadat tak pahunchane ka mauqa faraham karna aur mutalliqa mahkamon ko masail ke hal ke liye jawabdeh banana hai.

Unhon ne hukkam ko hidayat ki ke shehriyon ki shikayat par fori karrawai ki jaye aur awami masail ke hal mein kisi qism ki takheer na ki jaye.

Chief Minister ne kaha ke Balochistan mein koi no-go area nahin aur soobe ke awam riyasat aur security forces ke saath khade hain. Unhon ne kaha ke soobe mein hukumati aur opposition jamaaton ke arkan-e-assembly apne halqon mein baqaidagi se jaate hain aur ilaqai taqribat mein shirkat karte hue awam se rabte mein rehte hain.

Rabta sarkon ki tameer

Ilaqai taraqqi aur rabta sarkon ki ahmiyat par baat karte hue Chief Minister ne kaha ke Punjab ke ilaqe Taunsa ko Balochistan se milane wali shahrah ke liye wafaqi hukumat se funds ke ijra ki khatir koshishen ki gayi hain. Isi tarah Chhappar national highway se Kharar Bazdar tak sarak ki tameer ke liye survey ke ahkamat jari kar diye gaye hain.

Is project ki takmeel se Balochistan ko Punjab tak rasai ke liye ek aur mutabadil raasta muyassar aayega, jis se amad-o-raft mein aasani paida hone ke saath tijarati sargarmiyon ko bhi farogh milega.

Taleem aur Sehat

Chief Minister ne zila Barkhan mein shamil hone wale ilaqon Andar Pahoor, Meerri Wah aur Rarra Shumm samet tamam mutalliqa ilaqon ke sarkari school kholne ke liye khusoosi hidayat jari karne ka zikr kiya. Unhon ne kaha ke hukumat taleemi sahuliyat ki faraahmi aur taleemi idaron ki faaliyat ko yaqeeni banane ke liye iqdamat kar rahi hai. Bachiyon ki taleem ko bhi yaksan ahmiyat di ja rahi hai aur is maqsad ke liye ek pilot project par kaam jari hai taake bachiyon ko taleem ke behtar mawaqe faraham kiye ja saken.

Is mauqe par siyasi o samaji rahnuma Mir Yaqoob Bazdar ne Chief Minister Balochistan se mulaqat ki aur unhen ilaqe ke masail aur taraqqiyati zaruriyat se aagah kiya. Chief Minister ne mutalliqa umoor par zaroori iqdamat ki hidayat jari kin.

Ilaqe mein tibbi sahuliyat aur mareezon ki barwaqt muntaqili ke liye Chief Minister ne Kharar Bazdar se Dera Ghazi Khan tak mareezon ko muntaqil karne ke liye fori taur par ambulance service faraham karne ki hidayat ki. Unhon ne wazeh kiya ke is ambulance service ke mahana akhrajat hukumat-e-Balochistan bardasht karegi taake ilaqe ke shehriyon ko hangami tibbi zaroorat ke waqt sahulat muyassar aa sake.

Chief Minister Mir Sarfraz Bugti ne is azm ka izhar kiya ke hukumat awami masail ke hal, Taleem o Sehat ki sahuliyat ki behtari aur pasmanda ilaqon mein taraqqiyati amal ko aage barhane ke liye amali iqdamat jari rakhegi.