Chand sikar raha hai, satah par 10 hazar se zaid nai dararen, tehqeeq mein zalzalon ka khadsha

New York: Chand musalsal sikar raha hai aur is ki satah par 10,000 se zaid nai dararon ka inkishaf hua hai, jis se mustaqbil mein chand par bheje jane wale khalai missions ki salamti se mutaliq khadshat barh gaye hain.

Ghair mulki media ki report ke mutabiq sayyaron ke science journal mein 14 October ko shaya hone wali tehqeeq mein bataya gaya ke guzishta 400 million saal ke douran chand ka nisf qutar taqriban 45 meter kam hua hai.

Tehqeeq kaise ki gayi

Yeh tehqeeq American Smithsonian idare ke scientist Thomas R. Watters ki sarbarahi mein ki gayi. Is mein chand ke gird gardish karne wale khalai jahaz ke camera se hasil kardah tasaweer ka tajziya kiya gaya. Scientists ne 17 saal ke douran hasil ki gayi lakhon tasaweer ka jaiza le kar chand ki sakht aur is mein hone wali tabdeelion ka mutalea kiya.

Tehqeeq ke mutabiq chand ki androoni hararat kam hone ke baais is ka hajm musalsal ghat raha hai. Mojooda raftar ke mutabiq is ka nisf qutar har 10 lakh saal mein 6 se 11 centimeter mazeed kam ho sakta hai.

Zalzalon ka khadsha

Tehqeeq mein bataya gaya ke sikarne ke baais chand ki bairooni satah par shiknen aur dararen paida hui hain, jin se chhoti chattani dhalwanen wujood mein aayi hain. Is amal ke nateeje mein chand ki satah par hazaron maqamat par zalzale bhi aa sakte hain.

Scientists ke mutabiq zameen par taqriban 90 feesad zalzale zameen ki parton ki sarhadon ke qareeb aate hain, jabke chand ek hi bari part par mushtamil hai. Is liye wahan sikarne ke baais paida hone wali dararen kisi bhi maqam par harkat aur zalzale ka sabab ban sakti hain.

Mahireen ka kehna hai ke yeh surat-e-haal mustaqbil mein chand par insani mojoodgi aur NASA ke Artemis missions ki mansoobabandi ke liye aham hai, kyunke khalai missions ke douran chand par aane wale zalzalon aur satah ki tabdeelion ko madd-e-nazar rakhna zaroori hoga.

Scientists ke mutabiq chand ki ibteda arbon saal qabl us waqt hui thi jab ek bara falakiyati jism zameen se takraya tha. Is tasadum ke nateeje mein khala mein bikharne wala garm malba jama ho kar chand ki shakal ikhtiyar kar gaya tha.