Safeer Rizwan Saeed Sheikh ka Pak-America Tech Connect 2026 se khitab, IT taawun par zor

Washington: America mein Pakistan ke safeer Rizwan Saeed Sheikh ne Pak-America Tech Connect 2026 se khitab karte hue mojooda tech sharakatdariyon aur ubharti Technology mein sarmaya kari aur bahmi taawun ke wasee mawaqe ujagar kiye.

Tech Connect 2026 ke teesre edition ka aghaz Silicon Valley, San Francisco se hua aur is baar yeh teen mazeed American shehron mein munaqid ho raha hai. Agli conferences bil-tarteeb 19, 21 aur 23 October ko Dallas, Washington DC aur Chicago mein hongi.

Silicon Valley conference

Conference mein Pakistani Technology companies ke numainda’on, sanat kaaron, karobari shakhsiyaat aur sharakat daron ne bharpoor shirkat ki. Pakistan ke Technology sector aur Silicon Valley ke darmiyan rawabit mazboot banane aur taawun ke mawaqe talash karne par khusoosi tawajjoh di gayi.

Pakistan ki sarkardah IT companies ne apni karkardagi se mutaliq maloomat pesh kin aur American market mein Technology ke farogh ke hawale se tajurbat aur khayalat ka tabadla kiya gaya.

Pakistan se Silicon Valley tak aalmi Technology companies ki tameer o tawseeh ke mauzoo par panel mubahse mein American market mein dakhle, bade karobari idaron ko sarif banane, aalmi teamon ko wusat dene aur Artificial Intelligence samet ubharti Technology se istefade par tabadla-e-khayal hua.

Safeer ka khitab

Rizwan Saeed Sheikh ne Technology, jiddat aur karobari sargarmiyon ke zariye Pak-America iqtisadi rawabit mazeed mustahkam karne ki ahmiyat par zor diya. Un ka kehna tha ke Pakistan ke IT sector mein bahmi mufad par mabni sharakatdariyon ke qiyam, American mandiyon tak rasai mein tawseeh aur ubharti Technology mein mushtarka sarmaya kari ko barhana hoga.

Unhon ne kaha ke Tech Connect jaise iqdamaat Pakistan ki Technology ke shobe mein salahiyaton ko ujagar karne, sazgar abadiyati awamil se istefada karne aur jadeed sharakatdariyon ko farogh dene ke liye aham platform hain. Un ke mutabiq jadeed Technology mein sarmaya kari Pakistan aur America ke darmiyan paedar iqtisadi talluqat ka aham tareen sutoon hai.

Safeer ne Pakistan aur America ke karobari idaron aur Technology ke shobe se wabasta fareeqain ke darmiyan taweel al-muddati rawabit ke farogh ke liye safarat khane ke taawun ke azm ka aada kiya.

Unhon ne Silicon Valley aur American West Coast mein muqeem Pakistani nizad American mahireen par zor diya ke woh Pakistan ko kam lagat, miyari aur musabiqati tech destination ke taur par mutaruf karane aur mustahkam karne ki mushtarka koshishon mein bharpoor kirdar ada karen.