Balochistan High Court ne maazoor afraad ke huqooq par amalderamad ke liye jamey report talab kar li

Quetta: Balochistan High Court ne maazoor afraad ke huqooq ke tahaffuz, maali o taleemi moaawanat, Sehat ki sahuliyat, mulazmaton mein maazoori quota aur deegar qanooni muraaat par amalderamad ke liye mutaliqa hukkam se jamey report talab kar li hai.

Adalat ne Balochistan Persons with Disabilities Support Fund (Kumak) ki policy aur funds ki taqseem ka jaiza lete hue hidayat ki ke maazoor afraad Act 2007 ki dafaat ko madde nazar rakhte hue qabil-e-amal tajaweez pesh ki jayen.

Chief Justice Balochistan High Court Justice Muhammad Kamran Khan Mulakhail aur Justice Najmuddin Mengal par mushtamil do rukni bench ne aaini darkhast number 1422/2024 ki samaat ke dauran hukm diya ke darkhast guzaron ke wukala do hafton ke andar apni jamey tajaweez Advocate General aur Additional Advocate General ke daftar ke zariye pesh karen, jis ke baad mutaliqa hukkam in tajaweez ki roshni mein nazar-e-sani shuda report adalat mein jama karayen.

Kumak program ki report

Samaat ke dauran Kumak program ke Program Director ki janib se pesh kardah report mein bataya gaya ke Kumak policy 2025 ke tahat maazoor afraad ko taleemi moaawanat, Karobar ke liye maali madad, fanni o peshawarana tarbiyat, bahali ki sahuliyat aur moaawin aalaat ki faraahmi samet mukhtalif iqdamat kiye ja rahe hain. Program ke tahat ab tak taqriban 34 hazar maazoor afraad registered ho chuke hain, jabke fund ka ibtidai sarmaya teen arab rupay hai aur mutawaqqa mahana aamdan taqriban 27 million rupay batayi gayi hai.

Report ke mutabiq Kumak Council program ki nigrani aur intizami umoor ke liye qaim ki gayi hai, jis ke chairperson soobai wazir bara-e-samaji behbood hain aur Council mein zyada se zyada aath arkan shamil hain. Program ke tahat 18 saal se kam umar maazoor afraad ko mahana chhe hazar rupay jabke 18 saal ya is se zaid umar ke afraad ko aath hazar rupay maali moaawanat faraham ki jati hai.

Report mein funds ki taqseem ki tafseelat dete hue bataya gaya ke 38 fisad raqam baqaida mahana maali moaawanat, 7 fisad taleemi wazaif, 25 fisad moaawin aalaat, 5 fisad fanni o peshawarana tarbiyat aur 20 fisad bila sood rozgar qarzon ke liye mukhtas hain. Moaawin aalaat mein electric wheelchairs, tri-motorcycles, scootys, walkers, bysakhiyan, samaat ke aalaat, masnooi aaza aur safed chhadi samet deegar zaroori sahuliyat shamil hain.

Darkhast guzaron ke aitrazat

Darkhast guzaron ki janib se pesh hone wali wakeel Inam Khair Advocate aur mutaliqa aaini darkhast number 1647/2025 ke darkhast guzar ke wakeel Muhammad Akram Shah Advocate ne report par aitraz karte hue kaha ke taleemi moaawanat ke liye sirf saat fisad raqam mukhtas karna nakafi hai. Unhon ne nishandahi ki ke report mein Sehat ki sahuliyat, nijee hospitalon mein maazoor afraad ke liye 50 fisad riayat aur qanoon ke tahat faraham kardah deegar huqooq o muraaat ka munasib ihata nahin kiya gaya.

Adalat ko bataya gaya ke Balochistan mein maazoor afraad ki haqiqi majmui tadad tahal maloom nahin, jabke Kumak program ke bare mein moassir tashheer na hone ke baais bohat se mustahiq afraad registration aur dastiyab sahuliyat se mehroom ho sakte hain. Darkhast guzaron ke wukala ke mutabiq mukhtalif shobon ke liye mukhtas raqoom bhi maazoor afraad ki zarooriyat poori karne ke liye nakafi dikhayi deti hain.

Is moqe par mehkama samaji behbood, hukumat Balochistan ke Assistant Director Waseem Akram ne mauqif ikhtiyar kiya ke Sehat se mutaliq maali moaawanat ke liye Balochistan Awami Health Endowment Fund bhi mojood hai, jo Sehat ke shobe mein mustahiq afraad ki madad ke liye kaam karta hai.

Mutaliqa idaron ki talabi

Adalat ne maazoor afraad ke huqooq ke mukammal nifaz ko yaqeeni banane ke liye mutaliqa mehkamon aur idaron ke numainDon ko bhi aainda karrawai mein shamil karne ki hidayat ki. In mein Private Hospital Regulatory Authority, mehkama S&GAD, mehkama School Education, Colleges o Higher Education, Transport, Planning and Development aur Local Government ke hukkam shamil hain. Is ke alawa Pakistan Railways ke Divisional Superintendent, Civil Aviation Authority Quetta aur National Highway Authority ke mutaliqa afsaran ko bhi talab kiya gaya hai.

Adalat ne hidayat ki ke mutaliqa hukkam maazoor afraad ke liye umar mein riayat, sarkari mulazmaton mein muqarrara maazoori quota, nijee hospitalon mein riayat, taleem, naqal o hamal aur deegar qanooni sahuliyat se mutaliq iqdamat aur un par amalderamad ki tafseelat pesh karen. Advocate General aur Additional Attorney General ke daftar ko hukm ki nuqool mutaliqa hukkam tak pahunchane aur un ki hazri yaqeeni banane ki zimmedari bhi saunpi gayi hai.

Adalat ne case ki mazeed samaat 16 November 2026 tak multawi kar di.