Wazir-e-aala Sarfraz Bugti ka Quetta Development Package par jaiza ijlas: 12 mansoobay mukammal, 7 par kaam jaari
Quetta: Wazir-e-aala Balochistan Mir Sarfraz Bugti ki zer-e-sadarat Chief Minister Secretariat mein Quetta Development Package se mutaliq aham ijlas hua, jis mein soobai darul hukumat ki taraqqi, khoobsurati aur shehri sahuliyat ki behtari ke liye jaari mansoobon ki pesh raft ka jaiza liya gaya.
Ijlas ko bataya gaya ke Quetta Development Package ke tahat 12 mansoobay mukammal ho chuke hain, 7 mansoobon par kaam jaari hai jabke 5 naye mansoobay bhi tajweez kiye gaye hain.
Wazir-e-aala Mir Sarfraz Bugti ne jaari mansoobon par kaam ki raftar mazeed taiz karne aur un ki barwaqt takmeel har soorat yaqeeni banane ki hidayat ki, jabke naye tajweez karda mansoobon par bhi bila takheer kaam shuru karne ka hukm diya.
Quetta soobay ka chehra hai
Wazir-e-aala ne kaha ke Quetta soobay ka chehra hai aur shehr ki taraqqi o khoobsurati poore Balochistan ki shanakht se juri hui hai. Hukumat Quetta ko aik behtar, khoobsurat aur jadeed soobai darul hukumat banane ke liye tamam dastiyab wasail barooey kaar laye gi.
Unhon ne kaha ke Quetta ki maazi ki khoobsurati aur tareekhi shanakht ki bahali ke liye jaame hikmat amli ke tahat amli iqdamat kiye jayenge, jabke buniyadi shehri sahuliyat ki behtari, infrastructure ki taraqqi aur tazeen o araish ke mansoobay tarjihi buniyadon par mukammal kiye jayen.
Wazir-e-aala ne hidayat ki ke Quetta Development Package ke mansoobon mein miyar, raftar aur shaffafiyat yaqeeni banai jaye aur taraqqiyati kaamon mein ghair zaroori takheer se gurez kiya jaye. Mir Sarfraz Bugti ne azm zahir kiya ke hukumat Quetta ko aisa khoobsurat aur munazzam shehr banane ke liye purazm hai jahan shehriyon ko behtar buniyadi sahuliyat maisar hon aur soobai darul hukumat apni tareekhi o saqafati shanakht ke sath aik jadeed shehr ke taur par bhi numayan ho.
Ijlas mein Chief Secretary Balochistan Shakeel Qadir Khan, SMBR Kumbar Khan Dashti, Secretary Finance Jahangir Khan aur Project Director Rafique Baloch samet mutaliqa hukkam ne shirkat ki.
Tasveer: Bashukriya DGPR Balochistan
Mazeed parhen: Balochistan
Qila Saifullah mein karwai, aham Dehshatgardi commander halak: Ziaullah Langove
Usta Muhammad: Assistant Commissioner ka DHQ hospital ka daura, teen doctor duty par maujood nahin paye gaye
Usta Muhammad: Deputy Commissioner ka digital library ka daura, tameeraati kaam ka jaiza
Quetta: Soobai mohtasib Balochistan ki zer-e-sadarat muqadmat o shikayat ki pesh raft ka jaiza
Rakhni: Assistant Commissioner ki aate ki dukanon ki achanak checking, naap tol mein kami par jurmane
Jafarabad: Assistant Commissioner Dheeraj Kalra ka District Headquarters Hospital ka daura, tibbi sahuliyat ka jaiza
Quetta: Shikayat o muqadmat ki pesh raft par soobai mohtasib ka afsaran ke sath aham ijlas
Usta Muhammad: Deputy Commissioner ki sadarat mein District Coordination Committee ka ijlas
Soobai wazir Sehat Bakht Kakar: Balochistan mein do saal se Polio ka koi case report nahin hua
Governor Balochistan se American businessman Tanveer Ahmed ki mulaqat, Scholarships aur sarmaya kari par baat cheet
Turbat: Government Girls Model High School ki talibaat ka Radio Pakistan Turbat ka mutalaati daura
