Quetta mein building codes ki khilaf warzi ki ijazat nahin: Administrator Metropolitan Bashir Ahmed Barech ka Chamber of Commerce ka daura

Quetta: Quetta Metropolitan Corporation ke Administrator Bashir Ahmed Barech ne kaha hai ke Chief Minister Balochistan Mir Sarfraz Ahmed Bugti ke vision aur khusoosi hidayat ki roshni mein Quetta shehar ko saaf, munazzam, khoobsurat aur shehriyon ke liye behtar banane ke liye amali iqdamat tezi se jari hain. Shehar ki behtari, khoobsurati, safai suthrai, Tajawuzat ke khatme aur taameerati qawanin o building codes par amalderamad yaqeeni banane ke liye tamam mutaliqa idaron aur karobari biradari ko saath le kar mushtarka laiha-e-amal tashkeel diya jaye ga.

Unhon ne yeh baat Quetta Chamber of Commerce and Industry ke daure ke mauqe par sadr Muhammad Ayub Brohi aur deegar ohdedaran o cabinet se munaqida taqreeb se khitab karte hue kahi.

Bashir Ahmed Barech ne kaha ke Chief Minister ka vision Quetta ko ek saaf, khoobsurat, munazzam aur shehri sahuliyat se aarasta shehar banana hai aur Metropolitan Corporation isi vision ko amali shakl dene ke liye apni tamam tar salahiyatein barooye kaar la rahi hai, jis ke liye mutaliqa idaron, tajir biradari aur shehriyon ka taawun nagzeer hai. Unhon ne kaha ke Metropolitan Corporation aur Quetta ki tajir o karobari biradari ke darmiyan mazboot rabta waqt ki aham zaroorat hai, kyunke shehar ke masail kisi ek idare ki koshishon se hal nahin ho sakte.

Ghair qanooni taameerat aur Tajawuzat ke khilaf karrawai

Administrator ne kaha ke Quetta shehar mein building codes aur deegar taameerati qawanin ki khilaf warzi ki ijazat nahin di jaye gi. Ghair qanooni taameerat aur Tajawuzat ke khilaf qanoon ke mutabiq karrawai jari rakhi jaye gi, jabke tijarati o rehaishi ilaqon mein awami sahuliyat aur traffic ki rawani mutasir karne wali Tajawuzat ke khatme ke liye bhi mauasir iqdamat kiye jayenge.

Unhon ne kaha ke Chief Minister Balochistan ki hidayat ke mutabiq shaffafiyat, merit aur qanoon ki baaladasti ko yaqeeni bante hue Metropolitan Corporation ke zer-e-nigrani jari taraqqiyati aur deegar shehri umoor ko mazeed behtar banaya jaye ga aur tamam umoor qanoon, qawaid o zawabit aur merit ke mutabiq anjaam diye jayenge. Metropolitan Corporation mein nai team ke saath shehar ki behtari ke liye marboot aur mauasir andaz mein kaam kiya jaye ga aur tamam afsaran o ahalkaron ko apni zimmedariyan ahsan tareeqe se anjaam dene ki hidayat ki jaye gi.

Bashir Ahmed Barech ne Chamber ke ohdedaran se appeal ki ke woh Tajawuzat ke khatme, building codes par amalderamad, safai suthrai, shehar ki khoobsurati aur deegar shehri masail ke hal ke liye Metropolitan Corporation ke saath bharpoor taawun karein. Unhon ne kaha ke tajir biradari shehar ki maishat mein aham kirdar ada kar rahi hai aur Metropolitan Corporation karobari biradari ke jaiz masail ke hal ke liye har mumkin taawun kare gi.

Is mauqe par Quetta Chamber of Commerce and Industry ke sadr Muhammad Ayub Brohi aur deegar ohdedaran ne bhi shehar ki behtari aur karobari biradari ko darpesh masail ke hal ke liye Metropolitan Corporation ke saath taawun aur musbat kirdar ada karne ke azm ka izhar kiya.

Tasveer: bashukriya DGPR Balochistan