Quetta: DC Mehrullah Badini ki zer-e-sadarat District Insdad-e-Polio Committee ka ijlas, koi bachcha qatron se mehroom na rahe

Quetta: Deputy Commissioner Quetta Mehrullah Badini ki zer-e-sadarat District Insdad-e-Polio Committee (DPEC) ka ijlas hua, jis mein zile mein jari insdad-e-Polio muhim ki pesh raft, field teamon ki karkardagi aur bachchon ko qatre pilane ke amal ka tafseeli jaiza liya gaya.

Ijlas mein Additional Deputy Commissioner General, Deputy DHO, District Polio Coordinator, NSTOP staff samet mehkama Sehat aur insdad-e-Polio programme ke mutaliqa afsaran shareek hue. Muhim ki mujmui soorat-e-haal, teamon ki karkardagi, bachchon ki coverage, reh jane wale bachchon (missed children) aur darpesh challenges par ghaur kiya gaya, jabke hukkam ne ahdaf ke hasool par briefing di.

Deputy Commissioner Mehrullah Badini ne kaha ke Polio ka khatma hukumat ki awleen tarjeehat mein shamil hai aur muhim mein kisi qism ki ghaflat ya kotahi bardasht nahin ki jaye gi. Unhon ne tamam dastiyab wasail baroye kaar lane aur field teamon ki nigrani mazeed moassar banane ki hidayat ki.

Unhon ne zor diya ke zila Quetta mein koi bachcha Polio se bachao ke qatron se mehroom na rahe, reh jane wale bachchon ki nishandahi kar ke unhein har soorat vaccine pilai jaye, aur hassas ilaqon mein khusoosi tawajjoh aur moassar monitoring yaqeeni banai jaye. Unhon ne idaron ke darmiyan rabta mazboot banane ki hidayat ki taake Quetta samet poore suba ko Polio se paak karne ki koshishen kamyab hon.

Tasveer: bashukriya DG PR Balochistan