Punjab mein monsoon barishon ka aakhri spell, PDMA ka alert jari

PDMA ke mutabiq 12 se 17 September tak Rawalpindi, Jhelum, Chakwal, Talagang aur Attock mein barish ka imkan hai jab ke 14 se 17 September ke douran Lahore, Sialkot, Sheikhupura, Narowal, Mandi Bahauddin, Gujranwala, Gujrat, Wazirabad, Hafizabad, Kasur, Okara, Nankana Sahib aur Sargodha mein barish mutawaqqe hai.

Khushab, Mianwali, Noorpur Thal, Faisalabad, Jhang, Toba Tek Singh, Layyah, Bhakkar, Sahiwal, Dera Ghazi Khan, Multan aur gard-o-nawah mein bhi barish ka imkan zahir kiya gaya hai.

DG PDMA Saif Anwar Jappa ne soobe bhar ke commissioners aur deputy commissioners ko alert rehne ki hidayat karte hue kaha hai ke wazir-e-aala Punjab ki hidayat ke mutabiq zilai intizamia ko peshgi alert jari kar diya gaya hai.

Isi tarah bade shehron mein monsoon barishon ke baais urban flooding ka khadsha hai, jabke Rawalpindi, Lahore, Gujranwala aur Faisalabad mein shehri Sailab ka khatra maujood hai.

PDMA ka kehna tha ke barsati nalon mein flash flooding ka bhi khadsha hai, jis ke pesh-e-nazar mehkama sehat, abpashi, taamir-o-mawasalat, local government aur livestock ke mutaalliqa idaron ko bhi alert kar diya gaya hai.

Murree, Galiyat aur deegar pahari ilaqon mein landslide ke khadshe ke baais bhi mutaalliqa intizamia ko zaroori iqdamat ki hidayat ki gayi hai.

Doosri janib DG PDMA ne shehriyon se appeal ki hai ke kharab Mausam mein ehtiyati tadabir ikhtiyar karein, kachche aur boseeda makanat mein rihaish se gurez karein kyunke monsoon ke douran aise makanat girne se zyada amwat report hui hain.

Aandhi aur toofan ki soorat mein mehfooz maqamat par rehne aur ghair zaroori safar se gurez karne ki hidayat bhi ki gayi hai.

Alawa azin shehriyon ko aasmani bijli se bachao ke liye mehfooz maqamat par rehne jabke bachon ko nasheebi ilaqon, jama shuda pani, bijli ki taron aur khambon se door rakhne ki hidayat ki gayi hai.

PDMA ne mazeed kaha ke garj chamak aur toofani Mausam ke douran shehri khule aasman tale jane se gurez karein jab ke emergency ki soorat mein shehri PDMA helpline 1129 par rabta kar sakte hain.