Naseerabad: Sarkari imaraton mein solar system ke mansoobe, DC Virender Lal ka tender process ka jaiza
Naseerabad: Deputy Commissioner Naseerabad Virender Lal ne Assistant Director Local Government ke daftar mein mukhtalif taraqqiyati mansoobon ke tender process ka tafseeli jaiza liya. Is moqe par Major Yasir, Assistant Director Local Government Ahmed Nawaz Jatak, SDO Building Abid Ali Pahnoor aur deegar mutaliqa afsaran bhi maujood the.
Afsaran ne Deputy Commissioner ko mansoobon ki tender dastawezat, takhmeena jaat, takneeki o maliyati umoor aur boli ke amal se mutaliq briefing di. Bataya gaya ke in mansoobon ke tahat mukhtalif sarkari mahkamon ki imaraton aur sarkari tansibaat mein solar system nasb kiye jayenge, jis se sarkari idaron ki bijli ki zaroriyat poori karne mein madad milegi aur bijli ke akhrajat mein bhi kami aayegi.
Tender committee ke chairman ki haisiyat se Virender Lal ne tender process ke tamam marahil ka bareek beeni se mushahida kiya aur mansoobon ki nauiyat, mausool hone wali boliyon aur thekedaron ki peshkashon ke bare mein maloomat hasil keen. Unhon ne hidayat ki ke tender ka har marhala hukumati policy, murawwaja qawaneen aur qawaid o zawabit ke mutabiq mukammal kiya jaye, shaffafiyat, merit aur ghair janibdari har surat yaqeeni banai jaye aur tamam boliyon aur dastawezat ki mukammal jaanch partal ke baad hi ahl thekedar ko kamyab qarar diya jaye.
Deputy Commissioner ne kaha ke kamyab thekedar ke haq mein tamam qanooni o intizami taqaze poore karne ke baad work order jaari kiye jayen taake mansoobon par bila wajah takheer ke baghair kaam shuru ho sake. Sirf tender ke amal ko shaffaf banana kafi nahin, amali kaam ke dauran bhi miyar, raftar aur muqarrara specifications par mukammal amal dar aamad zaroori hai; afsaran mansoobon ki baqayda nigrani karen aur naqis ya ghair miyari material ke istemal par fori karrawai karen.
Virender Lal ne kaha ke taraqqiyati mansoobon mein kisi qism ki kotahi, ghaflat ya miyar par samjhauta bardasht nahin kiya jayega. Unhon ne mansoobon ki muqarrara muddat mein takmeel aur sarkari funds ke istemal mein mukammal shaffafiyat ki hidayat karte hue kaha ke awami sahuliyat ke liye mukhtas funds haqiqi maanon mein awami mufad par kharch hon aur in ke samarat aam shehriyon tak pahunchen.
Tasveer: Bashukriya DGPR Balochistan
Mazeed parhen: Balochistan
Qila Saifullah mein karwai, aham Dehshatgardi commander halak: Ziaullah Langove
Usta Muhammad: Assistant Commissioner ka DHQ hospital ka daura, teen doctor duty par maujood nahin paye gaye
Usta Muhammad: Deputy Commissioner ka digital library ka daura, tameeraati kaam ka jaiza
Quetta: Soobai mohtasib Balochistan ki zer-e-sadarat muqadmat o shikayat ki pesh raft ka jaiza
Rakhni: Assistant Commissioner ki aate ki dukanon ki achanak checking, naap tol mein kami par jurmane
Jafarabad: Assistant Commissioner Dheeraj Kalra ka District Headquarters Hospital ka daura, tibbi sahuliyat ka jaiza
Quetta: Shikayat o muqadmat ki pesh raft par soobai mohtasib ka afsaran ke sath aham ijlas
Usta Muhammad: Deputy Commissioner ki sadarat mein District Coordination Committee ka ijlas
Soobai wazir Sehat Bakht Kakar: Balochistan mein do saal se Polio ka koi case report nahin hua
Governor Balochistan se American businessman Tanveer Ahmed ki mulaqat, Scholarships aur sarmaya kari par baat cheet
Turbat: Government Girls Model High School ki talibaat ka Radio Pakistan Turbat ka mutalaati daura
