MERC 1122 ke bede mein 9 nayi ambulances shamil, Wazir-e-Sehat Bakht Muhammad Kakar ne emergency response software ka iftitah kiya

Quetta: Soobai Wazir-e-Sehat Bakht Muhammad Kakar ne kaha hai ke Balochistan mein hadsaat ke fori response aur qeemti insani jaanon ke tahaffuz ke liye emergency ambulance services ko jadeed khutoot par ustuwar kiya ja raha hai. Highways sameet mukhtalif muqamat par hadsaat ki soorat mein hukumat-e-Balochistan ke qayam kardah MERC 1122 markaz par mutasireen ko fori tibbi imdad dene ke baad zaroorat ke mutabiq trauma centers aur deegar sehat ki sahuliyat mein muntaqil kiya jata hai.

Unhon ne yeh baat MERC 1122 head office mein 9 nayi ambulances ki faraahmi ki taqreeb-e-ronumai aur emergency response software ke iftitah ke mauqe par kahi.

DG MERC 1122 Zulfiqar Jatoi ne apne khitab mein kaha ke jadeed ambulances aur digital response software ke zariye hangami soorat-e-haal mein response time mazeed behtar hoga aur zakhmiyon ko barwaqt tibbi imdad ki faraahmi yaqeeni banai ja sakegi.

DG Health Services Balochistan Dr Muhammad Amin Mandokhail ne kaha ke mehkama-e-sehat emergency services ko mazeed moassir banane aur soobe ke door daraz ilaqon tak barwaqt tibbi sahuliyat ki faraahmi ke liye tamam dastiyab wasail baroye kaar la raha hai. Unhon ne bataya ke emergency ambulance service ke bede mein shamil 9 nayi ambulances advance life support ki sahulat se lais hain, jin se service ka daira-e-kaar wasee hoga aur zakhmiyon ko barwaqt tibbi imdad aur mehfooz muntaqili ki sahulat maisar aayegi. MERC 1122 ke tamam rescuers 24 ghante, hafte ke saaton din mustaidi aur peshawarana andaz mein khidmaat anjam de rahe hain aur fori response ke baais mutaddid qeemti jaanein bachai gayi hain.

Tamam ambulances 1122 ke control and command mein

Soobai Wazir-e-Sehat Bakht Muhammad Kakar ne kaha ke bohat jald Balochistan ki tamam ambulances ko 1122 ke control and command mein laya ja raha hai taake deegar soobon ki tarah Balochistan ke awam bhi ambulance service se mustafid ho sakein. Unhon ne kaha ke Chief Minister Balochistan ke vision ke mutabiq shobae sehat mein inqilabi islahat ki ja rahi hain taake un ke samraat awam tak pahunchein.

MERC 1122 ke emergency response software ke zariye Balochistan bhar mein ambulances ki moassir tracking mumkin hogi. Is nizam ke tahat kisi bhi zila mein maujood ambulance ki maujooda position, dastiyabi aur naql-o-harkat ki barwaqt maloomat hasil ki ja sakengi aur kisi bhi hangami soorat-e-haal mein qareeb tareen ambulance ko munazzam andaz mein jaye hadsa par rawana kiya ja sakega.

Wazir-e-Sehat ne kaha ke Balochistan ki wasee-o-areez jughrafiyai hudood mein awam ko barwaqt sehat ki sahuliyat ki faraahmi ke liye digitalization wahid moassir rasta hai, jis se shaffafiyat mein izafa hoga aur ambulances ki moassir monitoring, behtar intizam aur fori response yaqeeni banaya ja sakega.

Unhon ne rescue team, Director General Health, mutalliqa afsaran aur field mein din raat khidmaat anjam dene wale MERC 1122 ahalkaron ki karkardagi ko sarahte hue kaha ke yeh Balochistan mein ek model emergency service ban chuki hai. Hukumat-e-Balochistan ke taawun se in services ko mazeed wusat di jayegi taake soobe ke kisi bhi ilaqe mein hadse ki soorat mein mutasireen ko barwaqt tibbi imdad, ibtidai tibbi sahulat aur munasib sehat markaz tak muntaqili ki sahulat maisar ho.

Tasveer: Bashukriya DGPR Balochistan