Khuzdar mein Yaum-e-Azadi ki taqreebat ki tayyariyan: Deputy Commissioner Abdul Razzaq Sasoli ki zer-e-sadarat ijlas

Khuzdar: Deputy Commissioner Khuzdar Abdul Razzaq Sasoli ki zer-e-sadarat 14 August Yaum-e-Azadi Pakistan ki taqreebat ke intezamat aur tayyariyon ke hawale se ahem ijlas Deputy Commissioner meeting hall Khuzdar mein munaqid hua.

Ijlas mein SSP Khuzdar Dostain Dashti, Kalat Scouts ke Major Asrar, Assistant Commissioner Khuzdar Abdul Hafeez, Assistant Commissioner Wadh Akbar Ali Mazarzai, XEN B&R Saleem Razzaq Umrani, District Health Officer Dr Abdul Hameed Lehri, District Education Officer Abid Hussain Baloch, XEN Roads Qazi Ateeq ur Rehman, XEN Sajjad Sahib, District Manager PPHI Saddam Hussain, District Livestock Officer Dr Muhammad Anwar Zehri, District Support Officer Madam Ruqayya Obaid, Deputy Commissioner ke admin officer Muhammad Murad Gazozai aur deegar idaron ke numaindon ne shirkat ki.

Ijlas mein sarkari o nijji imaratoun par lighting, ahem shahraahon aur awami muqamat ko qaumi parchamon aur sabz hilali parcham ke rangon se sajane, parcham kushai, qaumi tarane, milli naghmon, taqareer, talba ke programmon aur football, cricket, volleyball aur badminton samet khelon ke muqablon ke inqaad par ghaur kiya gaya.

Deputy Commissioner Abdul Razzaq Sasoli ne hidayat ki ke 14 August ki taqreebat ke tamam intezamat barwaqt mukammal kiye jayen aur is qaumi din ko josh o jazbe, nazm o zabt aur waqar ke sath manane ke liye tamam dastiyab wasail barooye kaar laye jayen. Unhon ne kaha ke Yaum-e-Azadi hamein Pakistan ki azadi ki qadr, qaumi yakjehti, ittehad aur mulki taraqqi ke azm ki tajdeed ka mauqa faraham karta hai.

Ijlas mein aman o aman, security, traffic management, safai suthrai, bijli aur deegar zaruri sahuliyat samet taqreebat ko kamyab banane ke deegar intizami umoor par bhi tafseeli ghaur kiya gaya.

Tasveer: Bashukriya DG PR Balochistan