Khuzdar mein Shaheed Usman Ashiq Library ka iftitah, Commissioner Kalat Dr Tufail Baloch ne takhti ki neqab kushai ki

Khuzdar: Ilm o adab ke farogh ki janib ek tareekhi qadam uthate hue Khuzdar mein National Highway se munsalik DPC ke ahate mein jadeed sahuliyat se aarasta, Shaheed Usman Ashiq ke naam se mansoob library ka baqaida iftitah kar diya gaya.

Commissioner Kalat Division Dr Tufail Baloch ne Deputy Commissioner Khuzdar Abdul Razzaq Sasoli, SSP Khuzdar Dostain Dashti aur deegar zilai hukkam ke hamrah takhti ki neqab kushai kar ke library ka iftitah kiya. Iftitahi taqreeb mein afsaran aur shehr ki muaziz shakhsiyat maujood thin.

1994 se veeran imarat ilm ka gahwara ban gayi

Is mansoobe ki sab se munfarid baat yeh hai ke jis imarat ko library mein tabdeel kiya gaya hai woh 1994 se ghair abad aur veeran padi thi. Commissioner Kalat Division ki soch aur zilai intizamia ki dilchaspi se is khasta haal imarat ko mukammal tor par bahal kar ke ilm ka gahwara bana diya gaya hai.

Bolan Mining Enterprises Khuzdar (BME) ne na sirf is ki imarat tameer ki thi balke ab isay jadeed solar system se bhi lais kar diya hai, jis ki badolat load shedding aur barqi qillat ke bawajood talba ko bila ta’alul mutale ka moqa milega. Yeh iqdam BSDI ke tehat wasail ke istemal ki behtareen misaal hai.

Library mein CSS, PMS, NTS aur deegar teston ki kitabein, online database aur khamosh mutale ka mahaul muyassar hoga, jo talba ko woh sahuliyat faraham karega jo pehle sirf bare shehron mein dastiyab thin. Library mein mard o khawateen ke liye alehda mutala halls, research room, conference hall aur digital section qaim kiye gaye hain, jabke jadeed computers aur tez raftar internet ki sahulat se talba duniya bhar ki universities ke research papers tak rasai hasil kar sakein ge.

Khuzdar ke ilmi o adabi halqon ne is iqdam ko behad saraha hai. Taqreeb mein maujood mehmanon, professors aur asatiza ka kehna tha ke yeh library Khuzdar ke zaheen magar wasail se mahroom talba ke liye umeed ki nayi kiran hai, jis se ilaqe mein taleemi miyar behtar hoga aur muqable ka rujhan barhe ga. Shehriyon ne Commissioner Kalat aur Deputy Commissioner Khuzdar ke vision ko tameeri soch qarar dete hue kaha ke aise mansoobe hi naujawanon ko manfi sargarmiyon se door rakh kar tameer o taraqqi ki taraf raghib karte hain.

«Khuzdar ke liye ilmi inqilab ka aghaz»

Commissioner Kalat Division Dr Tufail Baloch ne taqreeb se khitab karte hue kaha ke yeh library sirf ek imarat nahin balke Khuzdar ke liye ilmi inqilab ka aghaz hai. Unhon ne kaha ke aaj ke daur mein ilm tak rasai hi taraqqi ki zamanat hai aur yeh library naujawanon ko woh platform degi jahan woh aalami miyar ke mutale se roshnas honge. Unhon ne mazeed kaha ke library ko jadeed tareen design, internet, computers aur research material se aarasta kiya gaya hai.

Deputy Commissioner Khuzdar Abdul Razzaq Sasoli ne kaha ke zilai intizamia ki awwaleen tarjeeh naujawanon ko taleemi sahuliyat faraham karna hai, aur is tarz ki library ki misaal poore region mein nahin milti.

Iftitahi taqreeb mein SSP Khuzdar Dostain Dashti, Assistant Commissioner Wadh Ali Akbar Mazarzai, ADC General Ilmuddin, Assistant Commissioner Khuzdar Abdul Hafeez Kakar, Assistant Commissioner Nal Abdullah Jan, Assistant Commissioner Zehri Rozeen Jamali, Education Officer Abid Hussain Baloch, Executive Officers Qazi Atiq, Engineer Saleem Razzaq Umrani, Engineer Liaqat Ali, MS Khuzdar Hospital, All Parties Shehri Action Committee Khuzdar ke sadr Bashir Ahmed Jatak, Abdul Hameed Baloch, thekedar Nawaz Hameedullah samet library staff aur deegar bhi maujood the.

Tasveer: Bashukriya DGPR Balochistan