Islamabad Somnath na Junaid Akbar hi Mahmood Ghaznavi, wafaq apna difa karega: Khawaja Asif

Unhon ne kaha ke roz Pakhtunkhwa mein jo khoon beh raha hai us se un ka dil nahin rota? Kya Taliban un ke ittehadi hain jo yeh KP police aur bahaduron ki shahadaton ka sadd-e-baab karne ki bajaye mazeed intishar aur nafrat phaila rahe hain.

Unhon ne mazeed kaha ke 27 September ko jis hamle ki yeh baat kar rahe hain kya woh Taliban ka hamla hai? Kya Pakistan mein muqeem Afghani is lashkar ka hissa honge? Wafaq poori quwwat se is ka difa karega.

Khawaja Asif ne kaha ke bani PTI aur us ke hawari iqtidar ke husool ke liye kis had tak ja sakte hain, hum ne 9 May ko dekha, 26 November ko dekha, ab yeh shakhs jo apne azaim bata raha hai, Pakistan ke awam un ki asliyat ka andaza laga sakte hain.

Unhon ne kaha ke yeh log kal bhi aman, taraqqi aur Pakistan ke dushman the aaj bhi hain aur kal bhi honge, lakh ikhtilafat hon koi Pakistani yeh zaban nahin bol sakta, yeh Pakistan dushman zaban hai kisi ko koi ibham reh gaya?

Unhon ne yeh bhi kaha ke Islamabad ko Somnath banane wala Mahmood Ghaznavi 24 ghante nahin guzre, daur laga gaya hai ke mera yeh matlab nahin tha, bani PTI ko chahne wale bhi apne jaise mile hain, us ne bhi siyasi zindagi mein jitne pentre badle hain us ko khud bhi yaad nahin honge.

Khawaja Asif ne kaha ke yeh sare aik jaise hain, aik doosre ki photo copy hain.