Hub pul par traffic jam ka hal: Shehar mein heavy traffic ke dakhle par pabandi ka faisla, Deputy Commissioner Hub ki zer-e-sadarat ijlas

Hub: Deputy Commissioner Hub Captain (retd) Jumma Dad Khan Mandokhail ki zer-e-sadarat zila Hub mein traffic management se mutaliq aik aham ijlas munaqid hua, jis mein Hub pul par rozana paida hone wale traffic jam, shehriyon ko darpesh mushkilat aur un ke moassir o deerpa hal ke liye mukhtalif tajaweez aur iqdamat ka tafseeli jaiza liya gaya.

Ijlas mein is baat par zor diya gaya ke zila intezamia ke tamam faisle awami shikayat aur shehriyon ki mushkilat ko madde nazar rakhte hue kiye gaye hain taake Hub pul par traffic ki rawani behtar banai ja sake aur awam ko ghair zaroori pareshani se nijat mile.

Briefing mein bataya gaya ke Hub pul par traffic jam ke mustaqil hal ke liye zila intezamia ne mamla mutaliqa aala hukkam ke sath uthaya aur Rangers hukkam ke sath mutaddid ijlas bhi kiye gaye. Ijlas ko bataya gaya ke shehar ki janib se aane wali heavy traffic Hub pul aur Rangers check post par rawani mein rukawat banti hai, jis se taweel dauranie ka traffic jam paida hota hai.

Bhawani ke maqam par bhari gadiyan rokी jayengi

Ijlas mein faisla kiya gaya ke shehar ke andar heavy traffic ke dakhle par pabandi aid ki jayegi aur police Bhawani ke maqam par tamam bhari gadiyon ko rok kar shehar mein dakhil hone se roke gi. Mazeed baraan LIEDA aur shehar ki hudood mein dakhil hone wali deegar gadiyon ki moassir nigrani ki jayegi, jabke City Police Station ke samne khusoosi checking aur traffic control ke intezamat ko mazeed moassir banaya jayega.

Yeh bhi faisla kiya gaya ke Chief Collector Customs Islamabad ko bazabta marasla irsal kiya jayega, jis mein Rangers check post ke qareeb markazi shahrah par khari Customs ki zabt shuda (Seized/Case Property) gadiyan fori taur par muntaqil karne ki darkhwast ki jayegi, kyunke yeh gadiyan bhi traffic ki rawani mein rukawat aur Hub pul par traffic jam ki aik aham wajah hain.

Deputy Commissioner Hub Captain (retd) Jumma Dad Khan Mandokhail ne tamam mutaliqa idaron ko hidayat ki ke traffic management plan par marboot aur moassir andaz mein fori amalderamad yaqeeni banaya jaye taake Hub pul par traffic jam ke masle ka deerpa aur qabil-e-amal hal mumkin ho aur awam ko behtar safri sahuliyat faraham ki ja sakein.

Ijlas mein Assistant Commissioner Hub, DSP Traffic, DSP Hub, Chairman Municipal Committee Hub, Chief Officer Municipal Committee Hub, Frontier Corps (FC) ke numainde, mehkama Excise ke numainde aur Chairman Municipal Committee Gadani ne shirkat ki.

Tasveer: Bashukriya DGPR Balochistan