Hanif Abbasi ka Mughalpura Steel o Carriage Shops ka dora, railway purza jaat ke miyar par samjhauta na karne ki hidayat

Lahore: Wafaqi wazir railway Muhammad Hanif Abbasi ne Mughalpura Steel aur Carriage Shops ka dora kiya aur mukhtalif shobon mein jari kaam ka jaiza liya. Unhon ne trainon mein istemal hone wale parts hangami bunyadon par muqarra miyar ke mutabiq tayyar karne ki hidayat ki.

Unhon ne steel shop mein electric arc furnace machine ka muaina kiya aur furnace mein tayyar hone wale purza jaat ke miyar ki janch ke liye qaim spectro lab ka bhi jaiza liya. Unhon ne hidayat ki ke lab ko International miyar ke mutabiq hum ahang kiya jaye.

Briefing mein bataya gaya ke electric arc furnace ke faal hone se steel shop ki paidawar mein izafa aur miyar mein behtari aayi hai.

Wafaqi wazir ne foundry shop, rolling mill, spring shop, buffer, wheel shop, lohar khane aur Steel o Carriage Shops ke deegar shobon ka bhi dora kiya.

Spring shop mein tayyar hone wale springs ke miyar ka jaiza lete hue unhon ne wazeh kiya ke quality ke miyar par kisi surat samjhauta nahin kiya jayega aur trainon mein istemal hone wale tamam purza jaat ki tayyari mein muqarra miyar ko yaqeeni banaya jaye.

Muhammad Hanif Abbasi ne mazdooron se mulaqat ke dauran heat allowance mein izafe ke ahkamat jari kiye.

Unhon ne mutaliqa hukkam ko hidayat ki ke scrap ka survey mukammal karke 31 December tak is ki farokht yaqeeni banai jaye, jabke Carriage Shops ke mukhtalif shobon mein jari civil works 30 November tak mukammal kiye jayen.