Commissioner Quetta Zeeshan Lashari ki zer-e-sadarat taleemi surat-e-haal par online ijlas, 155 school ghair faal

Quetta: Commissioner Quetta Division Zeeshan Lashari ki zer-e-sadarat Quetta Division mein taleemi surat-e-haal, schoolon ki faaliyat, taraqqiyati schemon aur taleemi sahuliyat ka jaiza lene ke liye online ijlas munaqid hua.

Ijlas mein Deputy Commissioner Quetta Mehrullah Badini, Deputy Commissioner Quetta West Munir Ahmed Durrani, Divisional Director Mehkama Taleem Madam Rubina aur EDO Quetta Dr Naseer Ali Shah ne online jabke Assistant Commissioner Political Quetta Division Syed Kaleemullah aur deegar mutaliqa afsaran ne shirkat ki.

Briefing

Divisional Director Mehkama Taleem ki janib se Commissioner ko Quetta Division mein Taleem ki mujmooi surat-e-haal, schoolon ki tadad, asatiza aur talba ke aadad o shumar, jari taraqqiyati schemon, taleemi programmon aur schoolon ko darpesh masail ke hawale se tafseeli briefing di gayi.

Briefing mein bataya gaya ke Quetta mein mujmooi tor par 667 schoolon mein 9 hazar 830 asatiza khidmat anjam de rahe hain, jabke in taleemi idaron mein 2 lakh 17 hazar se zaid talba zer-e-taleem hain. Quetta mein 25 jabke Mastung mein 10 taraqqiyati schemon par tezi se kaam jari hai.

Ijlas ko mazeed bataya gaya ke World Food Programme ke tahat Quetta mein primary jamaaton ke bachon ko khurak faraham ki ja rahi hai, jabke primary schoolon mein bachon ke dakhilon mein izafe ke liye bhi khusoosi iqdamat kiye ja rahe hain.

Darpesh masail

Ijlas mein taleemi idaron ko darpesh masail par bhi tafseeli ghaur kiya gaya. Briefing ke mutabiq Quetta mein 9 schoolon par Tajawuzat qaim hain, jabke gaadiyon ki adam dastiyabi, mutaliqa afsaran ke liye rehaish ke masail, chowkidaron aur khakroobon ki kami ke baais schoolon ki safai aur security ke hawale se mushkilat ka samna hai. Quetta Division mein 155 schoolon ke ghair faal hone ki nishandehi bhi ki gayi, jin ki faaliyat yaqeeni banane ke liye khusoosi tawajjo di ja rahi hai.

Ijlas ko bataya gaya ke schoolon mein asatiza ki hazri aur karkardagi ki nigrani ke liye monitoring ke nizam ko moassar banaya ja raha hai. Is moqe par is baat par zor diya gaya ke naye schoolon ki tameer ke bajaye zaroorat ke mutabiq maujooda primary schoolon ko middle aur high schoolon ki satah par upgrade kiya jaye, taake talba primary Taleem mukammal karne ke baad bhi apni Taleem jari rakh saken aur school chhorne ki sharah mein kami laayi ja sake.

Briefing mein mazeed bataya gaya ke shelter-less 34 schoolon aur Sailab se mutasira taleemi idaron ki bahali ke liye bhi iqdamat kiye ja rahe hain. Asatiza ki kami door karne ke liye contract par SSTs ki bharti, monitoring ke moassar nizam aur schoolon mein buniyadi sahuliyat ki farahami ke hawale se mukhtalif tajaweez par bhi ghaur kiya gaya.

Commissioner ki hidayat

Commissioner Zeeshan Lashari ne hidayat ki ke school chhorne wale bachon aur dropout ki sharah mein kami laane ke liye jame aur qabil-e-amal mansooba murattab kiya jaye, taake zyada se zyada bachon ko taleemi idaron mein barqarar rakha ja sake. Unhon ne schoolon ki satah par data murattab karne aur digital nizam ke zariye talba, asatiza, taleemi sahuliyat aur schoolon ki faaliyat se mutaliq maloomat ko moassar andaz mein record karne ki zaroorat par bhi zor diya, taake intezamia ko har taleemi idare ki haqiqi surat-e-haal se barwaqt aagahi hasil ho sake.

Commissioner ne mutaliqa afsaran ko schoolon ki baqaida nigrani, asatiza ki hazri yaqeeni banane, ghair faal schoolon ko faal karne, buniyadi sahuliyat ki farahami aur taraqqiyati schemon ki barwaqt takmeel ke liye iqdamat tez karne ki hidayat ki.

Unhon ne Mehkama Taleem ke afsaran ko hidayat ki ke portal system tak rasai aur RTMS ke hawale se aainda ijlas mein tafseeli briefing pesh ki jaye, taake taleemi idaron ki nigrani, data management aur intezami umoor ko mazeed moassar banaya ja sake.

Commissioner Quetta Division ne kaha ke taleemi idaron mein sahuliyat ki behtari, asatiza ki hazri, talba ke dakhilon mein izafe aur taleemi miyar ko behtar banane ke liye tamam mutaliqa idaron ke darmiyan marboot iqdamat nagozir hain, taake bachon ko miyari Taleem ki farahami yaqeeni banayi ja sake.

Tasveer: Bashukriya DG PR Balochistan