Chief Secretary Shakeel Qadir Khan ki Commissioners Conference: ghair qanooni nakon aur giran farooshi ke khilaf karrawai ka hukm

Quetta: Chief Secretary Balochistan Shakeel Qadir Khan ki zer-e-sadarat Commissioners aur Deputy Commissioners conference munaqid hui, jis mein sube mein jari taraqqiyati mansubon, intizami umoor, awami sahuliyat, Price Control, municipal services mein behtari aur mukhtalif hukumati iqdamat ka jaiza liya gaya.

Conference mein mukammal shuda taraqqiyati schemon ki monitoring aur evaluation se mutaliq pesh raft report ka jaiza liya gaya, jabke bataya gaya ke BSDI ke tahat teesre marhale ke taraqqiyati mansubon ka tendering amal shuru hai. Chief Secretary ne hidayat ki ke afsaran mansubon ke miyar, raftar aur awami ifadiyat ki baqaida nigrani karein aur mukammal shuda schemon ke nataij ka muassir jaiza lein.

Ghair qanooni tarkeen-e-watan aur ghair qanooni nake

Ijlas mein ghair qanooni ghair mulkiyon ki watan wapsi par pesh raft ka jaiza bhi liya gaya aur bataya gaya ke 11 lakh se zaid ghair qanooni tarkeen-e-watan ko wapas bhijwaya ja chuka hai. Ghair qanooni nakon ke khatme par tafseeli bahas hui aur Chief Secretary ne zilai intizamia ko hidayat ki ke ghair qanooni check postson ke khilaf muassir karrawai ki jaye aur shehriyon ki aamad-o-raft, karobari sargarmiyon aur naqal-o-hamal mein ghair zaroori rukawatein paida na hone di jayein.

Khuli kachehriyon ki mahana progress report ka jaiza lete hue Chief Secretary ne kaha ke khuli kachehriyan awam aur intizamia ke darmiyan barah-e-raast rabte ka muassir zariya hain, is liye in ka baqaida inqad kiya jaye aur shikayat ke hal ko mahaz kaghazi karrawai tak mehdood na rakha jaye. Conference mein is baat par zor diya gaya ke zilai intizamia aur mahkamon ke darmiyan muassir coordination ke baghair falahi mansubon aur sarkari policyon ke matlooba nataij hasil nahin ho sakte.

Price Control, mahsulat aur municipal services

Conference mein ashiya-e-zaroriya ki qeematon ka taqabuli jaiza, nirkh namon aur Azla mein qeematon ke taiyun ke tareeqa-e-kar par ghaur kiya gaya. Chief Secretary ne hidayat ki ke ashiya-e-zaroriya sarkari nirkhon par farokht hon aur najaiz munafa khori, zakhira andozi aur giran farooshi ke khilaf karrawai mein kotahi na ki jaye. Deputy Commissioners bazaron ke baqaida daure karein aur Price Control magistrates ko faal banayein.

Unhon ne Deputy Commissioners ko soobai mahsulat mein izafe ke liye wasail ke muassir istemal, tax net wasi karne aur revenue wasooli mein shaffafiyat yaqeeni banane ki hidayat bhi ki. Mutaliqa hukkam ko hidayat ki gayi ke door daraz ilaqon mein tainat sarkari afsaran-o-ahlkaron ki rihaish gahon ki tameer barwaqt aur miyar par samjhote ke baghair mukammal ki jaye, jabke intizami khala pur karne ke liye zaroori ohdon par afsaran ki tainati yaqeeni banai jaye.

Chief Secretary ne kaha ke municipal services aur safai ke nizam ki behtari ke liye shehri idaron ko fori aur marboot iqdamat karne honge; kachra barwaqt uthane aur thikane lagane, sewerage-o-nikasi-e-aab ki behtari, amle ki jawabdehi aur awami agahi se shehron ko saaf suthra banaya ja sakta hai. Unhon ne wazeh kiya ke zilai intizamia ki karkardagi ka bunyadi miyar awam ko di jane wali sahuliyat aur un ke masail ka barwaqt hal hai.

Tasveer: bashukriya DGPR Balochistan