Chief Minister Sarfraz Bugti se Mansoor Bajar ki mulaqat, Pak-Iran tijarat 10 arab dollar tak le jane ka hadaf

Islamabad: Chief Minister Balochistan Mir Sarfraz Bugti se Islami Jamhuriya Iran ke soobay Sistan ke governor Mansoor Bajar ne mulaqat ki, jis mein Pak-Iran taluqat, dotarfa tijarat, border management, sarmaya kari, border markets, ilaqai aman, security taawun aur maashi rawabit ke farogh samet bahmi dilchaspi ke mukhtalif umoor par tafseeli tabadla-e-khayal kiya gaya.

Mulaqat ke aghaz mein Chief Minister Mir Sarfraz Bugti ne Iran ke Supreme Leader ki shahadat par governor Sistan Mansoor Bajar se dili taziyat aur hamdardi ka izhar kiya aur kaha ke Pakistan bil-khusus Balochistan ke awam is dukh ki ghari mein Irani awam ke saath khare hain.

Governor Sistan Mansoor Bajar ne Balochistan ki hukumat aur awam ki janib se izhar-e-yakjehti par shukriya ada karte hue kaha ke hum Pakistan, bil-khusus Balochistan ke awam ki mohabbat aur taawun par shukr guzar hain. Unhon ne kaha ke un ke daure ka bunyadi maqsad donon mumalik ke darmiyan tijarati aur maashi taluqat ko mazeed wusat dena hai.

Tijarati hajam teen se das arab dollar tak

Governor Sistan ne kaha ke Pakistan aur Iran ke darmiyan maujooda tijarati hajam taqriban teen arab dollar hai, taham mushtarka koshishon se ise barha kar das arab dollar tak le jaya ja sakta hai. Un ka kehna tha ke sarhadi taluqat aur tijarat ke farogh se na sirf maashi sargarmiyon mein izafa hoga balke security se mutaliq challenges se nimatne mein bhi madad milegi.

Chief Minister Mir Sarfraz Bugti ne kaha ke hukumat Balochistan border par barter trade ko farogh dene aur tijarati hajam ko das arab dollar tak le jane ke hadaf ke husool ke liye har mumkin iqdamat karegi. Unhon ne kaha ke woh governor Sistan ki is raay se mukammal ittefaq karte hain ke maashi sargarmiyon mein izafa aman, istehkam aur behtar security mahol ke qiyam mein aham kirdar ada karta hai.

Chief Minister ne kaha ke Iran ke saath sarhad par qaim ibtidai teen border markets ko mazeed faal aur moassir banaya jayega, jabke mustaqbil mein mazeed border markets ke qiyam par bhi kaam kiya jayega taake sarhadi ilaqon ke awam ko rozgar aur tijarat ke behtar mawaqe muyassar aa saken. Unhon ne kaha ke Chagai se Sukkur tak railway track ki behtari ka mansooba donon baradar mumalik ke liye intehai ahmiyat ka hamil hai, jis se saman ki tarseel mein sahulat, tijarati sargarmiyon mein izafa aur dotarfa tijarat ko mazeed farogh milega.

Western Corridor ke liye alaihda security division

Chief Minister Balochistan ne bataya ke hukumat Western Corridor ke tahaffuz aur moassir nigrani ke liye aik alaihda security division qaim kar rahi hai. Un ke mutabiq is iqdam se na sirf mineral corridor ko mehfooz aur faal banane mein madad milegi balke Iran ke saath tijarat ko bhi nayi taqwiyat milegi, jis se donon mumalik ke iqtisadi rawabit mazeed mustahkam honge.

Mir Sarfraz Bugti ne kaha ke paedar aman hi taraqqi aur khushhali ki bunyad hai. Donon mumalik ko is azm ke saath aage barhna hoga ke apni sarzameen par mojood non state actors ke mukammal khatme ke liye mushtarka iqdamat kiye jayen taake sarhad ke donon janib abad Baloch awam aman, istehkam aur taraqqi ke samraat se bharpoor istifada kar saken.

Unhon ne kaha ke hukumat Balochistan livestock ki tijarat ke farogh ke liye jadeed slaughter houses aur cold storage ki sahuliyat qaim kar rahi hai aur is shobay mein Irani wafd ki sarmaya kari mein dilchaspi ka khairmaqdam karti hai. Chief Minister ne tajweez di ke Balochistan aur Sistan ki soobai hukumatein mushtarka working groups tashkeel den taake tijarat, sarmaya kari, sarhadi taawun, bunyadi dhanche ki taraqqi, zaraat, livestock aur awami rawabit se mutaliq muamalat par mustaqil bunyadon par pesh raft yaqeeni banai ja sake.

Mulaqat ke ikhtitam par donon rehnumaon ne is azm ka aada kiya ke Pakistan aur Iran ke tarikhi, mazhabi aur baradarana taluqat ko mazeed mazboot banaya jayega, sarhadi tijarat, sarmaya kari aur awami rawabit ko farogh diya jayega aur aman, istehkam aur mushtarka khushhali ke liye bahmi taawun ko mazeed wusat di jayegi.

Tasweer: Bashukriya DG PR Balochistan