Baldiyati intikhabat: Khyber Pakhtunkhwa hukumat ko qanoon sazi ke liye 3 hafte ki mohlat

Election Commission mein Khyber Pakhtunkhwa baldiyati intikhabat case ki sunwai member Sindh Nisar Durrani ki sarbarahi mein 4 rukni commission ne ki.

Special Secretary Election Commission ne bataya ke soobe ke 7 Azla mein halqa bandiyon ka amal ta’attul ka shikar hai, soobai hukumat Khyber Pakhtunkhwa bhar mein baldiyati intikhabat aik sath karana chahti hai, guzishta sunwai par Chief Secretary Khyber Pakhtunkhwa ne qanoon sazi ke liye 3 hafte ka waqt manga tha.

Hukkam ke mutabiq soobai cabinet committee ka ijlas 31 August ko hua, jis mein soobai hukumat ne digar soobon mein baldiyati nizam ka jaiza lene ki hidayat ki.

Chief Secretary KP ne bataya ke soobai cabinet ki committee qanoon mein tarameem par ghaur kar rahi hai.

Member Balochistan ne remarks diye ke Khyber Pakhtunkhwa hukumat takheeri harbe istemal kar rahi hai, aisa na ho ke commission ko wazir-e-aala ko talab karna parre.

Member Sindh Nisar Durrani ne kaha ke baldiyati intikhabat to karwane parein ge, commission ke paas bohat se aaini raste maujood hain, member KP ne kaha ke qanoon mein tabdeeli ke baad tamam halqa bandiyan dobara karna parein gi.

Special Secretary ne kaha ke soobai hukumat faisla kare to Election Commission poore soobe mein aik sath intikhabat karwa de ga.

Baad azan Election Commission ne KP hukumat ko qanoon sazi ke liye mazeed 3 hafte ka waqt de diya aur Khyber Pakhtunkhwa baldiyati intikhabat case ki mazeed sunwai 29 September tak multawi kar di.