Babar Azam ki batting practice shuru, Lord’s Test mein shirkat ke imkanat roshan

Qaumi team ke captain Babar Azam ne ungli ki chot se sehat yab hone ke baad baqaida batting practice ka aghaz kar diya hai.

Babar Azam ne coaching staff ke ek rukn ke hamrah indoor hall mein taweel aur bharpoor batting session kiya, jis ke baad Lord’s Test mein un ki shirkat ke imkanat roshan ho gaye hain.

Lord’s ke official Social Media account se bhi Babar Azam ki indoor practice ki video share ki gayi, jis ne Pakistani shaiqeen mein umeed paida kar di hai.

Qaumi batter ko Becknam mein practice match ke dauran dayen haath ki ungli par chot lagi thi, jis ke baais woh Headingley mein England ke khilaf pehle Test mein shirkat nahin kar sake the. Pakistan ko is match mein innings aur 103 runs se shikast ka samna karna pada tha.

Babar Azam ki wapsi Pakistan ki kamzor batting line ke liye bara sahara sabit ho sakti hai. Captain ki maujoodgi se na sirf middle order ko istehkam milne ki tawaqqo hai balke pehle Test mein shikast ke baad qaumi team ko Lord’s mein comeback karne ke liye bhi ahem taqwiyat mil sakti hai.