England ke khilaf 320 runs ka hadaf zehn mein tha, fitness aur reflexes par kaam karna hoga: Hussain Talat

Rawalpindi: Pakistan ke all-rounder batsman Hussain Talat ne kaha hai ke team ki soch yehi thi ke board par 320 runs banaye jayen to match jeeta ja sakta hai, aur isi plan ke sath aage barhe.

Match ki surat-e-haal par baat karte hue unhon ne kaha ke zehn mein 240 runs tak pahunchne ya wahan tak chase karne ka hadaf tha, taham Arafat jis tarah khele us ka credit unhein jata hai aur un ki yeh karkardagi Pakistan Cricket ke liye bohat achha sign hai.

Match ke baad press conference mein un ka kehna tha ke Arafat ne batting ke sath sath behtareen bowling bhi ki, woh ek achhe bowler hain aur un ki yeh karkardagi team ke liye faida mand hai.

Fitness par mazeed kaam ki zaroorat

Apni batting ke hawale se Hussain Talat ne kaha ke har khilari ka apna plan hota hai jabke coach ka apna, lekin hamara maqsad 300 plus runs ka target dena tha.

Unhon ne kaha ke main crease par set tha aur lag raha tha ke team ko 330 ke score tak le jayenge lekin badqismati se out ho gaya. England ki gend bohat achhi thi, taham mujhe apni fitness mazeed behtar karna parega kyunke mahsoos ho raha tha ke mere reflexes thore slow ho gaye hain jin par kaam karna zaroori hai.

Unhon ne mazeed kaha ke England ki team dunya ki top four ya five teamon mein shumar hoti hai aur aisi bari team ke khilaf perform karna ek challenge hota hai, meri koshish hai ke is challenge ko achieve karun.

Hussain Talat ka kehna tha ke hum bhi achha khel rahe hain aur jald top level ki teamon mein shamil honge, Haris aur Shaheen samet puri team form mein hai.