ODI Cricket mein reverse swing ki wapsi, naye qanoon se batters ki mushkilat barh gayin

Islamabad: ODI international Cricket mein khelne ke qawaneen mein tabdeeli ke baad reverse swing aik baar phir aham hathiyar ban kar samne aa gayi hai.

Media report ke mutabiq July 2025 mein mutaarif karaye gaye naye qanoon ke tehat captain 34 overs mukammal hone ke baad dono siron par istemal hone wali safed gendon mein se kisi aik ka intikhab kar sakte hain. Is se innings ke aakhri 16 overs mein gend zyada purani aur khurdari ho jati hai. Is tabdeeli ka maqsad bowlers ko behtar mawaqe faraham karna tha.

Aadad o shumar kya kehte hain

Aadad o shumar ke mutabiq qanoon mein tabdeeli ke baad aakhri 10 overs mein fast bowlers ki nisf full length gendon par aik degree se zyada swing dekhi gayi, jo guzishta sharah se taqriban 35 feesad zyada hai. Aakhri paanch overs mein bowlers ka economy rate bhi 8.40 se kam ho kar 7.95 runs per over reh gaya hai.

England ke coach Brendon McCullum ne Sri Lanka ke khilaf shikast ke baad khilariyon ko nayi surat-e-haal ke mutabiq hikmat-e-amli tabdeel karne par ghaur karne ka mashwara diya.

Pakistan ke Shaheen Afridi aur Naseem Shah samet kai alami bowlers ke liye bhi yeh tabdeeli aham sabit ho sakti hai. Shaheen aakhri overs mein ausatan 1.3 degree swing hasil kar rahe hain.

Tahum reverse swing mein izafa har mulk mein yaksan nahin. England mein numayan tabdeeli dekhi gayi hai, jabke Janubi Africa mein aainda World Cup se qabl is ke asraat ka andaza lagana abhi mushkil hai.

Maahireen ke mutabiq agar yeh rujhan barqarar raha to teemon ko aakhri overs ke bajaye innings ke ibtidai hisse mein zyada runs banane ki hikmat-e-amli apnana par sakti hai.