Yakum January 2027 se bijli ka naya tariff 27 rupay 30 paisay per unit karne ki tajweez, CPPA ki darkhwast

Islamabad: Mulk mein yakum January 2027 se bijli ka naya tariff 27.30 rupay per unit hone ka imkan hai.

Central Power Purchasing Agency (CPPA) ne saal 2027 ke liye bijli ki kharidari ki darkhwast National Electric Power Regulatory Authority (NEPRA) mein jama kara di hai. Is ke mutabiq agla saal bhi bijli sarfeen par bhari hi rahega.

3 hazar 439 arab rupay ki bijli kharidari ka takhmeena

CPPA ki darkhwast ke mutabiq saal 2027 mein bijli ki kharidari ki qeemat 3 hazar 439 arab rupay hogi. Is mein se 19 sau 14 arab rupay capacity payments ki mad mein ada kiye jayenge.

Saal 2027 mein bijli ki fuel cost ka takhmeena 12 sau arab rupay se zaid lagaya gaya hai.

Is ke alawa operation and maintenance cost ki mad mein 70 arab rupay se zaid aur transmission charges ki mad mein 248 arab rupay se zaid ada kiye jayenge.

NEPRA ausat qeemat ka taiyun karegi

Darkhwast mein yakum January 2027 se bijli ka naya tariff 27 rupay 30 paisay per unit hone ka imkan zahir kiya gaya hai. Ideal case mein power purchase ki qeemat 25 rupay 88 paisay per unit hone ki doosri tajweez di gayi hai.

CPPA ne NEPRA Authority ke paas chhe mukhtalif tajaweez jama karayi hain, jin ki bunyad par NEPRA Authority ausat qeemat ka taiyun karegi.