Sohail routine ke paband, khamosh taba aur comfort zone mein rehna pasand karte hain: Sabiq ahliya

Seema Sajdeh ne adakar jore Neha Dhupia aur Angad Bedi ke show ‘Double Date’ mein guftagu karte hue bataya ke Sohail aam tor par logon ke sath ghul mil jate hain, taham woh zyada guftagu karne wale insan nahin hain.

Unhon ne kaha ke Sohail zyada tar apne aap mein rehna pasand karte hain aur manoos mahol mein khud ko zyada aaram deh mehsoos karte hain, jabke woh intihai nijji tabiyat ke malik hain aur apni zaat tak mehdood rehna pasand karte hain.

Seema ne apne rishton ke hawale se baat karte hue kaha ke woh mustaqbil mein kisi rafaqat ke imkan ko mustarad nahin kartin, taham filhal woh tanha zindagi mein khush aur mukammal mutmain hain.

Sohail Khan se talaq ke baad apni zindagi ke bare mein guftagu karte hue Seema ne kaha ke ek masroof din guzarne ke baad ab un ki sab se zyada khwahish hoti hai ke woh ghar jayen aur apne kutton ke sath waqt guzarein.

Unhon ne barhti umr, khoobsurti aur khud ka khayal rakhne ke hawale se bhi khul kar guftagu karte hue inkishaf kiya ke woh apni khoobsurti aur skin care routine ke liye fillers, Botox, Profhilo aur laser treatments jaise cosmetic treatments bhi karwa chuki hain.

Show mein Seema Sajdeh ki guftagu ka markazi mauzu apni zaat ko samajhna aur apni zindagi mein sukoon mehsoos karna tha, jahan unhon ne apni zindagi ke mukhtalif pehluon par khul kar baat ki aur mushkil mauzuat par bhi izhar-e-khayal kiya.