Pakistan ke awam ki badhali kisi bhi siyasi jamaat ka masla nahin: Hafiz Naeem

Islamabad mein press conference karte hue Hafiz Naeem ur Rehman ka kehna tha ke hukumat awam ko koi relief dene ko tayyar nahin, petroleum masnuaat ki qeematon mein izafe ne mushkil mein daal diya hai, package ke naam par relief de kar awam ko petrol pumps par ladwaya ja raha hai.

Unhon ne kaha ke America Israel ke Iran par hamle ke baad aalmi market mein tel mehnga hua, deegar mumalik ne bhi petroleum qeematein barhain, magar Pakistan jitna izafa nahin hua, hukumat ne apne ahdaf se bhi zyada petroleum levy wasool kar li, aalmi market mein qeematein barhne par mazeed kamane ke liye hukumat ne petrol mehnga kar diya, petrol ki qeemat barhne ka asar middle class par par raha hai.

Ameer Jamaat-e-Islami ka kehna tha ke hukumat ko logon ka ehsas hi nahin hai, Pakistan ke awam ka masla kisi bhi siyasi jamaat ka masla nahin, hamara mutalba hai ke levy khatam ki jaye aur awam ko jeene diya jaye.

Unhon ne kaha ke jang ki surat mein koi bhi muahida muattal kiya ja sakta hai, jo gas paida nahin ho rahi, awam us ke bhi paise ada kar rahe hain, IPPs mafia ko roka jaye, awam ke liye roti sasti ki jaye, mojooda halat mein luxury items par pabandi lagayi jaye.

Hafiz Naeem ka kehna tha ke hukumat Jamaat-e-Islami ke pur-aman ehtijaj ko halka leti hai, hum ne march ke hawale se committees tashkeel de di hain, long march mein 20 September ko Lahore se rawana honge, do se teen roz mein Islamabad pahunch jayenge, Punjab, Sindh aur Khyber Pakhtunkhwa se log jama honge, bara ehtijaj hoga, aaj Mardan aur Peshawar dharne mein shirkat ke liye ja raha hoon

Ameer Jamaat-e-Islami ne mazeed kaha ke Saudi Arabia ki khudmukhtari ke difa ke liye Pakistan har had tak jayega.