Chaman: District Education Officer ke achanak muaaine, ghair hazir asatiza se wazahat talab

Chaman: District Education Officer Chaman Ashok Kumar Rajput ne zila bhar ke sarkari taleemi idaron mein taleemi miyar ki behtari, asatiza ki hazri, nazm-o-zabt aur safai suthrai ko yaqeeni banane ke liye achanak muaainon ka silsila tez kar diya hai.

Is silsile mein unhon ne Government Boys Model High School Chaman aur Government Boys High School Mohalla Shehsawar ka daura karte hue taleemi o intizami umoor, tadreesi amal aur schools mein dastiyab sahuliyat ka tafseeli jaiza liya.

Government Boys Model High School Chaman

21 October ko Government Boys Model High School Chaman ke achanak daure ke dauran District Education Officer ne subah ki assembly ki nigrani ki aur talba ki hazri, nazm-o-zabt aur school ki mujmui taleemi sargarmiyon ka jaiza liya. Is mauqe par mutaddid asatiza ghair hazir paye gaye, jabke washrooms ki naqis safai, computer lab ke ghair muassir istemal aur talba mein nazm-o-zabt ki kami par tashweesh ka izhar kiya gaya.

DEO ne school intizamia ko ek hafte ki mohlat dete hue hidayat ki ke safai suthrai, computer lab ke muassir istemal, asatiza ki barvaqt hazri, subah ki assembly ke baqaida inaqad aur talba mein nazm-o-zabt ki behtari ke liye fori aur muassir iqdamat kiye jayen. Unhon ne wazeh kiya ke ghair hazir asatiza se qawaid-o-zawabit ke mutabiq wazahat talab ki jayegi aur taleemi zimmedariyon mein ghaflat ko kisi surat nazarandaz nahin kiya jayega.

Mohalla Shehsawar ka daura

22 October ko Government Boys High School Mohalla Shehsawar ke daure ke dauran DEO ne mukhtalif class rooms, asatiza ke hazri register aur school ki log book ka tafseeli muaaina kiya. Safai suthrai ki naqis soorat-e-haal par mutalliqa amle ko fori islahi iqdamat ki hidayat ki gayi, jabke ghair hazir asatiza ko wazahat talabi ke notice jari kiye gaye.

Daure ke dauran District Education Officer ne mukhtalif class rooms mein ja kar talba se nisabi sawalat kiye aur un ki taleemi istedad, seekhne ki salahiyat aur tadreesi amal ke miyar ka jaiza liya. Numayan taleemi karkardagi ka muzahira karne wale talba ki hausla afzai ke liye mauqe par naqd inamat bhi diye gaye. Is ke ilawa ustaad Wazir Muhammad ki behtareen tadreesi salahiyaton aur muassir tareeqa-e-tadrees ko sarahte hue un ke liye taareefi letter jari karne ka elaan kiya gaya.

District Education Officer Chaman Ashok Kumar Rajput ne is azm ka izhar kiya ke sarkari taleemi idaron mein miyari taleem ki faraahmi, asatiza ki baqaida hazri, taleemi nazm-o-zabt, safai suthrai aur tadreesi amal ki behtari ko yaqeeni banane ke liye amli iqdamat jari rakhe jayenge. Unhon ne wazeh kiya ke fraiz mein ghaflat aur laparwai baratne wale ahalkaron ke khilaf qawaid-o-zawabit ke mutabiq bila imtiaz karrwai amal mein layi jayegi, jabke mehnati asatiza aur numayan karkardagi dikhane wale talba ki hausla afzai bhi jari rahegi.

Unhon ne is azm ka aadah kiya ke zila Chaman ke sarkari taleemi idaron mein taleemi mahaul ko mazeed behtar banane, talba ko miyari taleemi sahuliyat faraham karne aur tadreesi miyar buland karne ke liye nigrani aur achanak muaainon ka silsila jari rakha jayega.

Tasveer: Bashukriya DGPR Balochistan