Wazir-e-azam ki Irani sadr se mulaqat, taluqat mazeed mazboot banane par ittefaq

Mulaqat mein dono rahnumaon ne dotarfa taluqat ko mazeed farogh dene aur mazboot banane ke azm ka izhar kiya, jabke mukhtalif shobon mein taawun barhane ke liye moujood mawaqe se bharpoor istifada karne ki zaroorat par zor diya.

Wazir-e-azam Shehbaz Sharif teen roza sarkari daure par Kyrgyzstan pahunche, jahan Kyrgyzstan ki cabinet ke chairman Adil Beg Qasimaliev ne un ka istiqbal kiya.

Tarjuman daftar-e-kharija ke mutabiq wazir-e-azam Shehbaz Sharif 1 September ko SCO sarbarah ijlas se khitab mein alaqai aur alami umoor par Pakistan ka mauqif pesh karenge, jabke woh SCO Plus sarbarahi ijlas mein bhi shirkat karenge.

Wazir-e-azam World Nomad Games ki iftitahi taqreeb mein bataur mehman-e-khusoosi shirkat karenge aur ijlas mein sharik mukhtalif mumalik ke rahnumaon se dotarfa mulaqaten bhi karenge, jin mein bahmi taluqat, tijarat, sarmaya kari aur alaqai taawun samet deegar umoor par tabadla-e-khayal hoga.

Wazir-e-azam Shehbaz Sharif 2 September ko Kyrgyzstan ka sarkari daura bhi karenge, jahan sadr Sadyr Japarov se mulaqat mein Pak-Kyrgyz taluqat ke mukhtalif pehluon par baat cheet ki jaye gi.

Wazeh rahe ke SCO sarbarah ijlas mein Bharati wazir-e-azam Narendra Modi samet Russia, China aur Iran ke sadoor bhi sharik honge, jabke Pakistan aur Bharat ke wuzara-e-azam is hafte Bishkek mein ek hi muqam par moujood honge.

Wafaqi wuzara Jam Kamal Khan, Abdul Aleem Khan aur Attaullah Tarar bhi wazir-e-azam ke hamrah hain.