Qila Saifullah: Moavin Chief Minister Shahid Rind ne security forces ki karrawai ko saraha

Quetta: Chief Minister Balochistan ke moavin baraye itilaat o siyasi umoor Shahid Rind ne Qila Saifullah mein intelligence based operation ke dauran dehshatgard commander ki halakat par security forces ki karrawai ko sarahte hue kaha hai ke Balochistan mein dehshatgardon ke khilaf faisla kun karrawaiyan security forces ki pesha warana maharat, mustaidi aur moassir hikmat-e-amli ka suboot hain.

Shahid Rind ne kaha ke Fitna al-Khawarij ke dehshatgard commander ke khilaf kamyab karrawai aman dushman anasir ke azaim nakam banane aur Dehshatgardi ke networks ke khilaf moassir iqdamat ki ahmiyat ko ujagar karti hai. Dehshatgardi ke khilaf jang mein security forces ki barwaqt karrawaiyan aur pesha warana salahiyatein qabil-e-tehseen hain.

Moavin Chief Minister ne kaha ke Balochistan mein Dehshatgardi ke nasoor ke khatme ke liye security forces ki qurbaniyan aur khidmat layiq-e-tehseen hain. Dehshatgardon ke sath un ke sahulatkaron aur moavineen ke khilaf bhi bila imtiyaz karrawaiyan jari rakhna aman o istehkam ke qiyam ke liye naguzir hai.

Shahid Rind ne kaha ke security forces ki kamyab karrawaiyan Balochistan mein paidar aman ke azm ko mazeed mazboot karti hain. Soobe ke awam aman ke qiyam aur shehriyon ke jaan o maal ke tahaffuz ke liye security forces ki qurbaniyon ko qadar ki nigah se dekhte hain.

Unhon ne is azm ka izhar kiya ke Balochistan se Dehshatgardi ke mukammal khatme aur Aman o Aman ke qiyam tak dehshatgardon ke khilaf karrawaiyan jari rehni chahiyen.