Divisional Monitoring Officer Colleges Makuran Professor Barkat Ismail ka Girls Inter College Sarbandan ka daura

Sarbandan: Divisional Monitoring Officer Colleges Makuran Professor Barkat Ismail ne Government Girls Inter College Sarbandan ka daura kiya aur college ke tadrisi o intizami umoor, asatiza o talibat ki hazri, taleemi sargarmiyon, classrooms aur talibat ko faraham ki jane wali buniyadi sahuliyat ka jaiza liya.

Unhon ne college ke mukhtalif shobon ka muaina karte hue taleemi mahaul aur tadrisi amal se mutaliq maloomat hasil kin aur asatiza o talibat se mulaqat kar ke un ke masail, tajaweez aur taleemi zaruriyat ke baare mein agahi hasil ki.

Professor Barkat Ismail ne asatiza ki taleemi khidmat ko saraahte hue kaha ke talibat ko miyari taleem ki faraahmi, baqaida hazri aur sazgar taleemi mahaul yaqeeni banana waqt ki aham zaroorat hai. Unhon ne tadrisi miyar mein mazeed behtari, taleemi sargarmiyon ke farogh aur talibat ki salahiyaton ko ujagar karne ke liye moassar iqdamat jari rakhne par zor diya.

College ke tadrisi o ghair tadrisi amle ne unhein college ki majmui karkardagi, jari taleemi sargarmiyon aur darpesh masail se agah kiya. Professor Barkat Ismail ne yaqeen dilaya ke taleemi idaron ki behtari aur talibat ko behtar taleemi sahuliyat ki faraahmi ke liye mutaliqa umoor ko tarjihi buniyadon par ujagar kiya jaye ga.

Tasveer: Bashukriya DGPR Balochistan