Ziarat: Saniha Ziarat ke shuhada ke chehlum par Quran khwani, soobai wazir Haji Noor Muhammad Dumar ki shirkat

Ziarat: Soobai wazir Haji Noor Muhammad Khan Dumar ke zair-e-ehtimam Saniha Ziarat ke shuhada ke chehlum ke mauqe par Ziarat mein Quran khwani aur khatm-e-Quran ka rooh parwar aur wiqar ehtimam kiya gaya. Mehfil ka maqsad shuhada-e-Ziarat ke isal-e-sawab, maghfirat aur darajaat ki bulandi ke liye khusoosi duaen karna tha.

Is mauqe par soobai wazir CMD o chairman Balochistan Food Authority Haji Noor Muhammad Khan Dumar aur Deputy Commissioner Abdul Quddus Achakzai ne khusoosi taur par shirkat ki. Wazir-e-mausoof ne Quran-e-Pak ki tilawat ki aur shuhada-e-Ziarat ke darajaat ki bulandi, maghfirat aur jannat-ul-firdaus mein aala maqam ke liye dua ki, jabke ghamzada lawahiqeen ke liye sabr-e-jameel, hausle aur istiqamat ki bhi dua ki.

Taqreeb mein zilai sadr Abdul Sattar Kakar, tehsil sadr Habibullah Panezai, ulama-e-kiram, qabaili o siyasi rehnumaon, sarkari afsaran, motabareen aur ahl-e-ilaqa ki kaseer tadad ne shirkat ki. Shurka ne ijtimai taur par Quran-e-Pak ki tilawat ki, khatm-e-Quran mein hissa liya aur shuhada-e-Ziarat ki azeem qurbaniyon ko khiraj-e-aqeedat pesh kiya.

Soobai wazir Haji Noor Muhammad Khan Dumar ne kaha ke shuhada-e-Ziarat ne apni jaanon ka nazrana de kar Balochistan ke aman, riyasat ki izzat aur qanoon ki baaladasti ko qaim rakha aur qaum un ki qurbaniyon ko kabhi faramosh nahin karegi. Unhon ne kaha ke shuhada ki yaad mein munaqid hone wali aisi roohani mehfilen na sirf isal-e-sawab ka zariya hain balke shuhada ke ahl-e-khana ke sath izhar-e-yakjehti aur aqeedat ka amali mazhar bhi hain.

Aakhir mein shuhada-e-Ziarat ke liye ijtimai dua-e-maghfirat ki gayi aur dua ki gayi ke Allah Taala shuhada ki qurbaniyon ko sharf-e-qabooliyat ata farmaye, un ke darajaat buland farmaye aur lawahiqeen ko yeh sadma sabr ke sath bardasht karne ki taufeeq de. Is mauqe par shurka ke liye langar ka khusoosi ehtimam kiya gaya.

Tasveer: Bashukriya DGPR Balochistan