Ziarat mein chaar roza insdad-e-Polio muhim ka aghaz, 27 hazar bachchon ko qatre pilane ka hadaf muqarrar

Ziarat: Chief Minister Balochistan Mir Sarfraz Bugti ke vision ke mutabiq zila Ziarat mein chaar roza insdad-e-Polio muhim ka baqayada aghaz kar diya gaya. Deputy Commissioner Ziarat Muhammad Abdul Quddus Achakzai ne bachchon ko Polio se bachao ke qatre pila kar muhim ka iftetah kiya. Is mauqe par District Polio Officer Dr Shahbaz aur Deputy DHO Muqeet Khan Kakar samet mehkama Sehat ke hukkam bhi maujood the.

Muhim ke dauran zila Ziarat mein paanch saal se kam umar taqriban 27 hazar bachchon ko qatre pilane ka hadaf muqarrar kiya gaya hai. Mobile teams ghar ghar ja kar bachchon ko qatre pilayengi, jabke 29 fixed sites aur 12 transit points bhi qayam kiye gaye hain.

Deputy Commissioner ne kaha ke muhim ki kamyabi ke liye tamam intezamat mukammal kar liye gaye hain aur teams ko bharpoor security faraham ki gayi hai, taham muhim mein rukawat dalne ya sarkari teams ke kaam mein mudakhilat karne walon ke khilaf qanoon ke mutabiq sakht karrawai ki jaye gi.

Unhon ne walidain par zor diya ke paanch saal se kam umar tamam bachchon ko qatre zaroor pilayen. Unhon ne kaha ke Polio ek khatarnak aur moazuri ka baais banne wala marz hai jis ka mulk mein maujood hona baais-e-tashweesh hai, aur is ke khatme ke liye hukumat, mehkama Sehat, walidain, ulama karam, asatiza, qabaili umaidin aur civil society ko bharpoor kirdar ada karna hoga.

Tasveer: bashukriya DG PR Balochistan