Ziarat: Kan Depo High School mein JVT asatiza ke liye professional development day, ghair hazir asatiza par barhami

Ziarat: Chief Minister Balochistan Mir Sarfraz Bugti ke ahkamat, Deputy Commissioner Abdul Quddus Achakzai ki hidayat aur District Education officer ki nigrani mein Government Boys High School Kan Depo mein school aur deegar feeding schools ke Junior Vernacular Teachers (JVT) ke liye professional development day mun’aqid kiya gaya, jis mein das asatiza ne shirkat ki.

District Officer Education Ziarat Abdul Malik Taj is tarbiyati programme mein khusoosi taur par shareek hue. Programme ka aghaz tilawat-e-kalam-e-pak se hua, jis ke baad unhon ne shurka ke saath taweel nashist aur sair hasil behas ki.

Abdul Malik Taj ne shareek asatiza ki dilchaspi par itminan ka izhar kiya, jabke baghair itla rukhsat par rehne wale asatiza ki adam dilchaspi, farayz-e-mansabi se ghaflat aur is mufeed programme ko nazar andaz karne par sakht barhami zahir karte hue aainda kotahi ke murtakib asatiza ke khilaf mahkamana karrawai ka kaha.

Shurka ko programme ke aghraz o maqasid se agah kiya gaya. Shurka ki aksariyat SBK aur contract marahil ke zariye bharti hone wale asatiza ki thi, jinhon ne asbaq ki mansoobabandi, kamra-e-jamaat ki tanzeem aur talba ki behtar learning ke liye zaroori iqdamat ke baare mein jaan kar unhein kamra-e-jamaat mein barwe kar lane aur mukhtalif tadrisi tareeqon, sargarmiyon aur hikmat-e-amliyon se talba ko Taleem dene ki hami bhari.

Das baj kar paanch minute par shuru hone wala yeh programme taqriban ek baje khatam hua. Shurka ne programme ko maloomati aur mufeed qarar dete hue khushi ka izhar kiya aur aainda kamra-e-jamaat mein is par amal dar aamad ka wada kiya.

Tasveer: Bashukriya DGPR Balochistan