Zhob mein aate ka bohran shadeed, 50 kilo aate ki thaili 7 hazar 400 rupay mein farokht

Zhob: Balochistan mein aate ka bohran shiddat ikhtiyar kar gaya hai aur gharib awam do waqt ki roti ke liye pareshan hain. Aaj 17 October ko gharibat ke khatme ka aalmi din manaya ja raha hai, lekin gharibat, Mehngai aur ghizai qillat ne aam shehriyon ki zindagi ajeeran bana di hai.

Ittilaat ke mutabiq 50 kilo aate ki thaili 7 hazar 400 rupay mein farokht ho rahi hai, jo ek aam mazdoor, rehri baan aur dihari daar ki quwwat-e-kharid se bahar hai. Ek mazdoor jo din bhar mehnat karke bamushkil 500 rupay kamata hai, woh apne khandan ke liye aata aur deegar bunyadi zaruriyat kaise poori kare?

Doosri janib Punjab se Balochistan ko aate ki faraahmi par pabandi aid kiye jane ke baais qillat paida hone ki shikayat samne aa rahi hain, jis se awam ki mushkilat mein mazeed izafa ho raha hai.

Zhob ke awami o samaji halqon ne mutalba kiya hai ke hukumat-e-Balochistan aur mutaliqa hukkam fori taur par aate ke bohran ka notice len, Mehngai par qabu payen aur gharib awam ko sarkari nirkhon par sasta aata faraham karne ke liye muassir iqdamat karen, taake koi bhi khandan roti jaisi bunyadi zarurat se mehroom na rahe.