Zhob ke ilaqe Sheghalo mein Khuli Kachehri: 15 saal se band dispensary, band school aur pani ki qillat ki shikayat

Zhob: Zilai intizamia aur FC ke ishtirak se tehsil Kakar Khurasan ke ilaqe Sheghalo mein awami masail ke hal ke liye Khuli Kachehri munaqid ki gayi, jis ki sadarat Assistant Commissioner Kaleemullah ne ki.

Khuli Kachehri mein FC Balochistan, SHO thana Sheghalo Muhammad Yaseen, tafteeshi officer Wali Khan, mehkama livestock ke numainda, qabaili motabareen, ulama-e-kiram aur ilaqa makinon ne shirkat ki.

Awam ke mutalbat

Ilaqa makinon ne bataya ke bijli ki load shedding aur peene ke saaf pani ki shadeed qillat ne un ka jeena dobhar kar rakha hai. Bunyadi markaz-e-Sehat dispensary guzishta 15 saal se ghair faal hai, Government Middle School Sheghalo arsa-e-daraz se band hai, sarkein toot phoot ka shikar hain aur thekedar kaam adhoora chhor kar chala gaya hai.

Unhon ne mutalba kiya ke Aman o Aman ke liye Levies force fori bahal ki jaye aur thana Sheghalo mein police nafri ki kami poori ki jaye. Maal maweshi ke liye adviyaat aur vaccine ki adam dastiyabi, insani adviyaat ki qillat aur nayab jangli hayat ke ghair qanooni shikar par bhi tashweesh zahir ki gayi, jabke khana badoshon ki mushkilat ke izale aur taraqqiyati mansoobon mein Sheghalo ko khusoosi tarjeeh dene ka mutalba kiya gaya.

Assistant Commissioner Kaleemullah aur FC hukkam ne awam ke masail tahammul aur tawajjoh se sune aur yaqeen dehani karayi ke tamam jaiz mutalbat tarjeehi bunyadon par hukkam ke samne pesh kiye jayenge aur mutaliqa mehkamon ko jald az jald in masail ke hal ka paband kiya jayega.

Tasveer: Bashukriya DGPR Balochistan