Zhob: Commissioner Asif Ali Farrukh ka Tora Khola ke barish se mutasira ilaqon ka daura, mutasireen mein imdadi saman taqseem

Zhob: Commissioner Zhob Division Asif Ali Farrukh ne Assistant Commissioner Zhob Muhammad Naveed Alam ke hamrah Tora Khola ke barish se mutasira ilaqon ka tafseeli daura kiya aur haliya shadeed barishon aur barsati relon se hone wale nuqsanat ka jaiza liya.

Commissioner ne mutasira rabta sarkon, abgahon, nadi nalon aur deegar bunyadi dhanchay ko pahunchne wale nuqsan ka moaina kiya aur muwasalat o taamirat, PDMA, zila intezamia aur deegar idaron ko hidayat ki ke mutasira rabta sarkon ki bahali, malba hatane aur amad o raft ki jald bahali ke liye hungami bunyadon par iqdamat kiye jayen taake mutasira ilaqon ke awam ko mazeed mushkilat ka samna na karna pade.

Mutasireen mein imdadi saman ki taqseem

Asif Ali Farrukh ne kaha ke hukumat Balochistan barish se mutasira khandanon ki har mumkin madad ke liye purazm hai aur mutasireen ki bahali, relief aur bunyadi sahuliyat ki faraheemi ke liye tamam dastiyab wasail baroe kaar laye ja rahe hain. Unhon ne wazeh kiya ke kisi bhi mutasira khandan ko tanha nahin chora jayega aur imdadi sargarmiyon ki khud nigrani ki ja rahi hai.

Is mauqe par Commissioner ne barish se mutasira khandanon mein ration, khaime, kambal aur deegar zaroori imdadi saman taqseem kiya aur hidayat ki ke mutasireen ko khorak, pine ke saaf pani, tibbi sahuliyat aur deegar bunyadi zarooriyat ki faraheemi mein koi kotahi na barti jaye.

Daure ke dauran Commissioner ne barish ke dauran pesh aane wale afsosnak hadse mein jaan bahaq hone wale do salah bachche ke ahl-e-khana se mulaqat ki, marhoom ke liye fatiha khwani ki aur lawahiqeen se dili hamdardi aur taziyat ka izhar kiya. Unhon ne yaqeen dilaya ke zila intezamia mutasira khandan ke sath har mumkin taawun karegi.

Commissioner ne hidayat ki ke barsati nadi nalon ki musalsal nigrani ki jaye, nasheebi ilaqon ki surat-e-haal par kari nazar rakhi jaye aur hungami machinery ko mukammal tor par faal rakha jaye. Unhon ne awam se apeel ki ke shadeed barishon ke dauran ghair zaroori safar se gurez karein, barsati nalon aur selabi guzargahon se door rahein aur zila intezamia ki hifazati hidayat par amal karein.

Tasveer: Bashukriya DGPR Balochistan