Wazir-e-Taleem Rahila Durrani: Darsi kutub ki musalsal nazar-e-sani zaroori, Text Book Board ki teen roza workshop ikhtitam pazeer

Quetta: Balochistan Text Book Board ke zer-e-ehtemam book writers, musannifeen, editors, soobai jaiza karon, composing o layout, nigran-e-tabaat aur printers ki istedad-e-kaar mein izafe ke liye teen roza tarbiyati workshop ki ikhtitami nashist soobai Wazir-e-Taleem Rahila Hameed Khan Durrani ki zer-e-sadarat mun’aqid hui.

Workshop mein secretary secondary Taleem Lal Jan Jafar, chairman Balochistan Text Book Board Dr Gulab Khan Khilji, secretary Balochistan Text Book Board Dr Niaz Tareen, deputy director Idara Nisabiyat Najibullah Panezai, director PITE Fatima Mandokhel, mahakma-e-Taleem ke mukhtalif mazameen ke book writers, musannifeen, editors, professors, assistant professors, PhD asatiza o mahireen, Bureau of Curriculum and Extension Centre Balochistan ke numainda gan, maroof mahireen-e-Taleem, muhaqqiqeen, mahireen-e-mazmoon aur Text Book Board ke afsaran ne shirkat ki.

Darsi kutub mein behtari ki gunjaish hamesha rehti hai

Soobai Wazir-e-Taleem Rahila Hameed Khan Durrani ne khitab karte hue kaha ke Balochistan ki darsi kutub soobe ke maroof mahireen-e-Taleem, muhaqqiqeen, mahireen-e-mazmoon aur qabil asatiza ki ilmi o tehqiqi kawishon ka nateeja hain, aur hukumat Balochistan miyari, jadeed aur tehqeeq par mabni nisabi kutub ki tayyari aur talba ko behtar taleemi mawad ki faraahmi ke liye sanjeeda iqdamat kar rahi hai.

Unhon ne kaha ke Text Book Board ki bharpoor mehnat, ehtiyat aur musalsal jaize ke bawajood darsi kutub mein baaz auqat aghlat ya behtari ki gunjaish baqi reh sakti hai, is liye nisabi kutub ki musalsal nazar-e-sani, tehqeeq aur mahireen se raye lena aik mustaqil amal hona chahiye. Hukumat aur mahakma-e-Taleem is hawale se asatiza, talba, walidain aur muashre ke deegar bashuoor afraad ki tameeri tajaweez ka khair maqdam karte hain.

Wazir-e-Taleem ne bataya ke Text Book Board mein qaim research centre ke zariye nisabi kutub ke miyar ko behtar banane ke liye jadeed tehqeeq, ilmi tajziye aur mahireen ki aara ko shamil karne ka amal jari hai. Mausool hone wali mufeed tajaweez ka baqaida jaiza le kar unhen mutaliqa shobon aur mahireen ke sath share kiya jata hai taake darsi kutub ko asr-e-hazir ke taqazon se hum aahang kiya ja sake.

Unhon ne kaha ke workshop ka bunyadi maqsad darsi kutub ki tayyari ke mukhtalif marahil se wabasta afraad ki pesha warana istedad-e-kaar mein izafa, jadeed tareeqa haye tasneef o tadveen se agahi, mawad ki ilmi o tehqiqi janch, proof reading, composing, layout, tabaat aur miyar-e-ishaat ke amal ko mazeed moassir banana hai. Rahila Hameed Khan Durrani ke mutabiq miyari darsi kitab kisi bhi taleemi nizam ki bunyad hoti hai, is liye kitab ki tayyari ke har marhale mein miyar, durustagi, tehqeeq aur talba ki taleemi zaruriyat ko awwaleen tarjeeh di ja rahi hai, aur tehqeeq par mabni jaizon, mahireen-e-mazmoon ki mushawarat aur musalsal tarbiyat se nisabi kutub ka miyar mazeed behtar banaya ja sakta hai.

Secretary secondary Taleem Lal Jan Jafar aur chairman Text Book Board Dr Gulab Khan Khilji ne bhi workshop ki ahmiyat par roshni dali aur kaha ke jadeed taqazon se hum aahang nisabi kutub ki tayyari ke liye musannifeen, editors, jaiza karon aur deegar mahireen ki tarbiyat nagzeer hai, aur Text Book Board talba ko miyari taleemi mawad ki faraahmi ke liye apni zimmedariyan bharpoor andaz mein ada kar raha hai.

Workshop ke dauran shurka ko darsi kutub ki tasneef, tadveen, jaiza, tehqeeq, zaban o bayan ki durusti, composing, layout, proof reading, tabaat aur miyar-e-ishaat ke jadeed tareeqa-e-kaar se agah kiya gaya. Mahireen ne shurka ke sawalat ke jawabat diye aur darsi kutub ki tayyari mein darpesh mukhtalif masail ka hal bataya.

Tasveer: bashukriya DGPR Balochistan