Wadh mein jaali clinics ke khilaf karwai: 12 clinics aur 8 medical stores band, adwiyat ke namoone laboratory rawana

Khuzdar: Wadh mein zilai intizamia ne bari karwai karte hue 12 jaali clinics aur 8 medical stores band kar diye.

Deputy Commissioner Khuzdar Abdul Razzaq Sasoli aur District Health Officer Khuzdar Dr Abdul Hameed Lehri ki khusoosi hidayat aur Assistant Commissioner Wadh Akbar Ali Mazarzai ki nigrani mein Drug Inspector Obaidullah Shah ne Khuzdar, Wadh aur muzafati ilaqon mein jaali doctoron, baghair license medical stores aur ghair miyari adwiyat ke khilaf moassir karwai ki.

Hukkam ke mutabiq yeh karwai Drugs Act, 1976 aur awami mutalibe ke ain mutabiq hai. Shehriyon ki sehat se khelne walon ko kisi surat maafi nahin di jaye gi aur ghair registered clinics aur ghair qanooni karobar ke khilaf karwai jari rahe gi.

Moayine ke dauran mukhtalif medical stores se baaz mushkook adwiyat ke namoone muqarrara qanooni tareeqa kar ke mutabiq hasil kiye gaye, jinhein laboratory tajziye ke liye mutaliqa mujaz drug testing laboratory bheja jaye ga.

Jin medical stores aur clinics mein qanooni, takneeki ya intizami bezabtagiyan samne aayin un ki mukammal tafseelat, moayina reports, dastaveezi shawahid aur tasaweer ka baqayada record tayyar kiya jaye ga. Jin muqamat par baghair license ya ijazat ke tibbi ya adwiyati sargarmiyan jari paayi gayin, un ki tafseelat bhi alag murattab kar ke mehkama Sehat, Drug Regulatory Authority aur deegar mujaz idaron ko mazeed karwai ke liye bheji jayengi.

Mukhtalif makatib-e-fikr ne zilai intizamia aur mehkama Sehat ki is karwai ko sarahte hue ise awam ki sehat ke tahaffuz ki janib aham pesh raft qarar diya hai.

Tasveer: Bashukriya DGPR Balochistan