Usta Muhammad: Zakhira andozon se neelam shuda gandum ki hawalgi ke liye godam malikan ko qanooni notice jari karne ka faisla

Usta Muhammad: Director General mehkama Commodity Management hukumat-e-Balochistan ne apni team ke hamrah Deputy Commissioner Usta Muhammad se mulaqat ki, jis mein zakhira andozi ke khilaf seal kiye gaye gandum ke godamon aur neelam shuda gandum ki kamyab boli dehindagan ko hawalgi ke mamle par tafseeli tabadla-e-khayal kiya gaya.

Director General ne bataya ke zakhira andozi ke khilaf karrawai ke dauran seal kiye gaye godamon mein maujood gandum ki neelami ki ja chuki hai, taham neelam shuda gandum kamyab boli dehindagan ke hawale karne ke liye zilai intizamia ki moawinat darkar hai.

Ijlas mein faisla kiya gaya ke mutaliqa godam malikan ko qanooni notice jari kiye jayenge aur unhein neelam shuda gandum kamyab boli dehindagan ke hawale karne ka paband kiya jayega. Notice ke bawajood gandum hawale na karne ki soorat mein mutaliqa zakhira andozon ke khilaf qanooni karrawai karte hue muqadmat darj karwaye jayenge.

Ijlas mein Deputy Commissioner Shujaat Ali Khosa, Assistant Commissioner Usta Muhammad Maria Shamoon aur mutaliqa afsaran bhi maujood the. Zilai intizamia ne neelam shuda gandum ki hawalgi aur qanooni karrawai ke silsile mein mehkama Commodity Management ko mukammal taawun ki yaqeen dehani karai.

Tasveer: Bashukriya DGPR Balochistan