University of Turbat ke Pro Vice Chancellor Dr Kamal Ahmed ka City Campus mein AI aur IT classes ka daura

Turbat: University of Turbat ke Pro Vice Chancellor Dr Kamal Ahmed ne City Campus mein university ke zere-e-ehtemam jari artificial intelligence, digital photography aur deegar IT o pesha waranah courses ki classes ka daura kiya aur talba ke learning outcomes aur tarbiyati miyar ka jaiza liya.

Is mauqe par Registrar Gangzar Baloch, Director Public Relations Ijaz Ahmed aur shoba-e-qanoon ke sarbarah Mahmood Amir bhi un ke hamrah the. Daure ka maqsad digital tarbiyati miyar, talba ki hazri aur amli sargarmiyon ki sahuliyat ka barah-e-raast jaiza lena tha.

Pro Vice Chancellor ne computer labs aur classrooms ka moayena kiya aur instructors aur talba se courses ke miyar, labs, software, tarbiyati tareeqa-e-kar aur internet ki sahuliyat par feedback liya, jis par unhon ne itminan ka izhar kiya.

Dr Kamal Ahmed ne kaha ke mojooda daur mein artificial intelligence aur IT ki maharaten naujawanon ke kamyab mustaqbil ke liye nagzeer ho chuki hain, aur University of Turbat Vice Chancellor Professor Dr Gul Hasan ki qiyadat mein khitte ke naujawanon ko jadeed Technology aur pesha waranah maharaton se arasta karne ke liye tamam wasail barwe kaar la rahi hai. Unhon ne talba ko mashwara diya ke woh smartphone ko mahaz tafreeh ke bajaye apne mustaqbil ki tameer ke aale ke taur par istemal karen.

Baad azan unhon ne hukumat Balochistan ke RISE programme ke tahat naujawanon ke liye jari digital skills aur pesha waranah tarbiyati courses ki classon ka bhi moayena kiya.

Tasveer: Bashukriya DG PR Balochistan