University of Loralai mein FAO ke tahat kisanon mein makai ke beej ki taqseem, European Union ki mu’awanat

Loralai: University of Loralai mein Food and Agriculture Organization (FAO) ke zer-e-ehtimam «Revival of Balochistan Water Resources Programme» ke tahat chara jaat (makai) ke beej ki taqseem ki taqreeb munaqid hui. Is programme ko European Union (EU) ki maali mu’awanat hasil hai.

Taqreeb mein Vice Chancellor Professor Dr Ehsanullah Kakar ne khusoosi shirkat ki jabke un ke hamrah PSO to Vice Chancellor Dr Khalid Khan bhi mojood the. FAO ki dawat par Vice Chancellor ne maqami mustahiq kisanon aur mustafideen mein beej taqseem kiye.

Vice Chancellor ne maqami kashtkaron ki mu’awanat, maweshiyon ke liye miyari chare ki dastiyabi aur paedar zarai tareeqon ke farogh ke liye FAO aur European Union ki kawishon ko saraha. Unhon ne kaha ke zarai taraqqi aur kisanon ko jadeed sahuliyat ki faraahmi maqami maeeshat ko mazboot banane ke sath maweshi paalne walon ke liye bhi behtar mawaqe paida karti hai.

Un ka kehna tha ke Loralai jaise zarai o maldari se wabasta ilaqon mein miyari chara beej ki faraahmi se kisanon aur maldaron ko faida pohnchega aur livestock ke shobe ko farogh milega. Shurka ne in iqdamat ko khush aaind qarar dete hue umeed zahir ki ke aise mansoobon ka daira mazeed wasee kiya jayega taake zila Loralai ke zyada se zyada kisan aur maldar mustafid ho saken.

Tasveer: bashukriya DGPR Balochistan