University of Loralai ke talba ki Pakistaniyat quiz muqable mein soobe bhar mein doosri position

Loralai: University of Loralai ke shobae siyasiyat ke talba Qudratullah aur Muhammad Bilal ne Pakistaniyat quiz muqabla 2026 mein shandar karkardagi dikhate hue Balochistan ki 13 jamiaat ke darmiyan doosri position hasil kar li. Kamyab talba ko inam ke taur par 30 hazar rupees naqd bhi diye gaye.

Muqabla 11 se 13 August 2026 tak National University of Sciences and Technology (NUST) Balochistan campus mein munaqid hua jis mein soobe bhar ki jamiaat ke talba ne shirkat ki. Is kamyabi par University ki intezamia, asatiza aur talba mein khushi ki lehar daud gayi aur intezamia ne ise idare ke liye qabil-e-fakhr kamyabi qarar diya.

Is mauqe par soobai wazir Taleem mohtarma Rahila Hameed Durrani aur mehkama Taleem Balochistan ke hukkam ka khusoosi shukriya ada kiya gaya jinhon ne talba ko soobai satah par salahiyaton ke izhar ka mauqa faraham karne mein taawun kiya. NUST Balochistan campus ke dean o campus director Brigadier Professor Dr Mugheeth Aslam aur Head of Government and Corporate Relations Riaz ul Haq ki janib se muqable ke kamyab inaqad ko bhi saraha gaya.

Vice Chancellor Engineer Professor Dr Ehsanullah Kakar ki qayadati salahiyaton aur sarparasti ko bhi is kamyabi mein aham qarar diya gaya, jabke shobae siyasiyat ke asatiza aur intezami amle ki mehnat ko kharaj-e-tehseen pesh kiya gaya. University intezamia ke mutabiq yeh kamyabi poore Loralai ke liye baais-e-fakhr hai aur zahir karti hai ke Balochistan ke naujawan munasib rehnumai aur mauqe milne par soobai aur qaumi satah par apni salahiyaton ka bharpoor muzahira kar sakte hain.

Tasveer: bashukriya DGPR Balochistan