Uch Power Plant ki security: Deputy Commissioner Naseerabad Varinder Lal ko PRO Tariq Khan Jamali ki briefing

Naseerabad: Deputy Commissioner Naseerabad Varinder Lal se Uch Power Plant ke Public Relations Officer Muhammad Tariq Khan Jamali ne mulaqat ki. Is moqe par Qadir Khan Khosa, Manzoor Shirazi aur deegar bhi maujood the.

Tariq Khan Jamali ne power plant ki maujooda surat-e-haal aur majmooi security intezamat par tafseeli briefing di. Is dauran plant ki ahmiyat, tansib ke atraf security surat-e-haal, intezamat ko mazeed moassir banane, mumkina khatre se nimatne ke peshgi iqdamat aur idaron ke darmiyan rabta kari par tabadla-e-khayal kiya gaya. Unhon ne security ahlkaron ki tainati, dakhli o kharji raston ki nigrani aur deegar hifazati intezamat se bhi agah kiya.

Deputy Commissioner Varinder Lal ne kaha ke Uch Power Plant aik aham qaumi tansib hai jis ki security har surat yaqeeni banai jaye gi. Unhon ne hidayat ki ke tamam hifazati iqdamat ka musalsal jaiza liya jaye aur idaron ke darmiyan rabta o taawun mazeed mazboot kiya jaye. Unhon ne kaha ke aham tansibat ki security mein ghaflat ya kotahi bardasht nahin ki jaye gi aur un ke tahaffuz ke liye tamam dastiyab wasail burue kar laye jayenge.

Tasveer: Bashukriya DG PR Balochistan