Turbat: Dhank ke sarkari school mein Youm-e-Asatiza ki taqreeb, talba ki taqareer mein asatiza ko khiraj-e-tehseen

Turbat: Government Boys Middle School Dhank mein head master Majid Ali ki zer-e-nigrani Youm-e-Asatiza ke silsile mein purwaqar taqreeb munaqid hui, jis mein talba aur asatiza ne shirkat ki. Nizamat Mehrab Karim ne ki jabke jamaat haftum ke talib-e-ilm Hamdan ne tilawat ki.

Talba ne Youm-e-Asatiza ki munasibat se taqareer mein asatiza ki azmat, mehnat, ikhlas aur qaum ki tameer o taraqqi mein un ke kirdar ko khiraj-e-tehseen pesh kiya aur kaha ke ustad talba ki shakhsiyat sazi aur roshan mustaqbil ki bunyad rakhte hain.

Buzurg ustad Abdul Rasheed ne kaha ke Taleem insan ki shakhsiyat sanwarne ka aham zariya hai aur ustad rehnumai kar ke talba ko zimmedar aur mufeed shehri banata hai; unhon ne talba par husool-e-ilm ke sath asatiza ke ehtram par zor diya.

Head master Majid Ali ne kaha ke asatiza qaum ke memar hain aur kisi qaum ka roshan mustaqbil asatiza ki mehnat, ikhlas aur rehnumai se wabasta hota hai. Ustad talib-e-ilm ki tarbiyat mein walid ki tarah aham kirdar ada karta hai, aur jo talib-e-ilm asatiza ka ehtram karta aur Taleem par tawajjo deta hai woh zindagi mein kamyab hota hai. Unhon ne talba ko baqaidagi se Taleem hasil karne aur salahiyatein masbat sargarmiyon mein burue kar lane ki talqeen ki.

Taqreeb ke ikhtitam par asatiza ne talba ki taqareer aur izhar-e-mohabbat ko saraha, aur talba ko Taleem ke sath akhlaq, nazm o zabt aur asatiza ke ehtram ko zindagi ka hissa banane ki talqeen ki gayi.

Tasveer: Bashukriya DGPR Balochistan