Tump mein Khuli Kachehri: Deputy Commissioner Barkat Ali Baloch aur Colonel Sher Alam Kundi ne awami masail sune
Tump: Zila intezamia Tump ke zair-e-ehtemam awami masail ke barah-e-raast hal aur awam o intezamia ke darmiyan moassir rabte ke farogh ke liye Khuli Kachehri ka inaqad kiya gaya, jis ki sadarat Deputy Commissioner Tump Barkat Ali Baloch ne ki jabke Colonel Sher Alam Kundi mehman-e-khusoosi the.
Khuli Kachehri mein civil society ke numainda’on, ilaqai motabireen, mukhtalif siyasi jamaaton ke rehnumaon, union councilon ke chairmanon aur awam ki bari tadad ne shirkat ki.
Soorab border, bijli aur kareezat ke masail
Is moqe par Naseer Ahmed Gichki, Haji Hanif Rind, Chairman Shahu Rind, Gul Jan Malik, Babu Badar, Ali Juma Zamrani aur deegar muqarrirein ne apne apne ilaqon ko darpesh masail ujagar kiye aur mutalliqa mahkamon ke sarbarahon se mukhtalif umoor par sawalat kiye.
Shurka ne aman o aman, zila Tump ke bunyadi dhanche ki bahali, rozgar ke mawaqe, abpashi ke masail, Soorab border ki bandish, tehsil Mand mein bijli ki faraahmi, rahdariyon ki bandish, Tump ta Turbat (Zubaida Jalal) shahrah par jari marammati kaam ki moassir nigrani, khushk kareezat ki bahali, zarai shobe ki taraqqi aur deegar awami masail par tafseeli guftagu ki.
Mutalliqa mahkamon ke sarbarahon ne shurka ke sawalat ke tasalli bakhsh jawabat diye aur masail ke hal ke liye intezamia ke iqdamat se agah kiya. Baad azan Colonel Sher Alam Kundi, Deputy Commissioner Tump Barkat Ali Baloch, SSP Arif Ali, mahkama PPHI, mahkama zaraat, mahkama B&R aur deegar mutalliqa mahkamon ke afsaran ne fardan fardan shurka ke sawalat ke jawabat diye aur un ke tahaffuzat door karne ki koshish ki.
Taqreeb mein Chairman Amin Qureshi, Assistant Commissioner Tump Sheikh Hayat, Assistant Commissioner Mand Mir Hasan, DSP Ismail Baloch, DDEO Tump o Mand, mukhtalif union councilon ke chairman, siyasi o samaji shakhsiyaat aur mukhtalif sarkari mahkamon ke afsaran bhi mojood the.
Khuli Kachehri ke ikhtitam par zilai intezamia ne is azm ka izhar kiya ke awami masail ke barwaqt hal, behtar tarz-e-hukmarani aur awami khidmaat ki faraahmi ke liye aise awami rabta programme aainda bhi baqaidagi se munaqid kiye jaenge.
Tasveer: Bashukriya DGPR Balochistan
Mazeed parhen: Balochistan
Zhob mein sooba-i mohtasib ki hidayat par Khuli Kachehri, shehriyon ki shikayat suni gayin
Turbat: University of Turbat ke University Model School ke Board of Trustees ka teesra ijlas
Qila Abdullah: Assistant Commissioner Sardar Abdullah Khan ki zer-e-sadarat mahkama maal ke umoor ka jaiza
Chaman: District Education Officer ke achanak muaaine, ghair hazir asatiza se wazahat talab
Loralai mein Deputy Commissioner ki sadarat mein revenue court day, muqadmat ki sama’at
Chaman: Aalmi Youm-e-Insidad-e-Polio par aagahi taqreeb, Deputy Commissioner ka khitab, front line workers ko asnaad
Shumali Dera Bugti: Chief Minister Sarfraz Bugti ki musalsal teesri Khuli Kachehri, shehriyon ke masail sune
Shumali Dera Bugti: Chief Minister Sarfraz Bugti ka naye sarkari daftar ka iftetah, tarqiyati mansoobon ka jaiza
Balochistan mein FWO ki karkardagi naqis rahi: Wazir-e-aala Sarfraz Bugti
Qila Saifullah mein karwai, aham Dehshatgardi commander halak: Ziaullah Langove
Usta Muhammad: Assistant Commissioner ka DHQ hospital ka daura, teen doctor duty par maujood nahin paye gaye
