Tor Nasir Cross par PTA aur Motorway Police ki karrawai, ghair qanooni tarkeen-e-watan aur coaches ki checking

Quetta: Soobai hukumat ke ahkamat ki roshni mein Secretary Transport Balochistan Muhammad Hayat Kakar ki hidayat aur Secretary PTA Balochistan Waheed Sharif Umrani ki nigrani mein Provincial Transport Authority aur Motorway Police par mushtamil team ne Tor Nasir Cross par karrawai ki.

Karrawai ka maqsad Afghan muhajireen aur ghair qanooni tarkeen-e-watan ke khilaf iqdamat ke sath sath long route coaches aur buses ki checking tha. Is moqe par musafiron ke data aur record ki janch partal ki gayi, jabke gadiyon ke kaghzat, route permit, fitness certificate aur driving license ka bhi muayena kiya gaya.

Karrawai ke dauran overloading aur zaroori kaghzat ki adam moujoodgi par mutaddid coach malikan ko jurmane kiye gaye.

Hukkam ne bataya ke soobai hukumat ke ahkamat par soobe bhar mein ghair qanooni tor par muqeem Afghan muhajireen ke khilaf musalsal karrawaiyan jari hain. Is silsile mein tamam transporters ko hidayat jari ki gayi hain ke woh ghair mulkiyon ko qanooni dastawezat ke baghair apni gadiyon mein sawar na karen.

Is ke alawa transporters ko hidayat ki gayi ke woh apni gadiyon ke kaghzat, permit aur fitness certificate lazmi sath rakhen. Hukkam ne mazeed kaha ke qaumi shahraahon par hadsaat ki rok tham ke liye traffic qawaneen par amldaramad ke hawale se kisi qism ki riayat nahin ki jayegi.

Tasveer: Bashukriya DG PR Balochistan