Speaker National Assembly Ayaz Sadiq ki Quetta mein Governor Balochistan Jaffar Khan Mandokhail se one-on-one mulaqat

Quetta: Speaker National Assembly Sardar Ayaz Sadiq ne ek roza daura Quetta ke dauran soobe ki taza tareen siyasi surat-e-haal, parliamentary umoor aur bahmi taawun se mutaliq aham mulaqatein kiin. Daure ka maqsad Balochistan ki siyasi qiyadat aur parliamentarians se rabton ko mazeed mazboot banana aur soobe ke masail o tarjihat par tabadla-e-khayal karna tha.

Quetta aamad par Governor Balochistan Jaffar Khan Mandokhail, Chief Minister Balochistan Mir Sarfraz Bugti, member National Assembly Jamal Shah Kakar, soobai wuzara aur arkan soobai assembly ne Speaker National Assembly ka istaqbal kiya.

Speaker National Assembly ne Governor Balochistan Jaffar Khan Mandokhail se one-on-one mulaqat ki, jis mein Balochistan ki mujmoi siyasi surat-e-haal, parliamentary muamalat aur soobe ko darpesh mukhtalif umoor par tafseeli tabadla-e-khayal kiya gaya, jabke Governor ne unhein soobe ki taza tareen siyasi surat-e-haal aur awami masail se aagah kiya.

Daure ke dauran Sardar Ayaz Sadiq ne Governor House mein parliamentarians, siyasi rahnumaon, Pakistan Muslim League (N) ke senior ohdedaran aur karkunon se bhi mulaqatein kiin. Party ohdedaran aur karkunon ne mukhtalif umoor se mutaliq sawalat kiye jin ke unhon ne tafseeli jawabat diye aur parliamentary o siyasi muamalat par apne khayalat ka izhar kiya.

Taziati mulaqatein

Qabl azeen Sardar Ayaz Sadiq ne Balochistan Assembly ke Speaker Captain (retd) Abdul Khaliq Achakzai ke jawan saal sahabzade Sanaullah Achakzai ke intiqal par Speaker chamber mein taziat aur yakjehti ka izhar kiya aur marhoom ke darjat ki bulandi aur lawahiqeen ke liye sabr-e-jameel ki dua ki.

Baad azan Speaker National Assembly soobai wazir-e-Taleem Rahila Hameed Khan Durrani ki rehaish gah bhi gaye jahan unhon ne un ki walida ki wafat par taziat ki aur marhooma ke isal-e-sawab aur ahl-e-khana ke liye sabr o istiqamat ki dua ki. Speaker National Assembly ka daura Quetta siyasi o parliamentary qiyadat ke darmiyan rabton ko mazeed mustahkam karne aur Balochistan ke masail ko qaumi sath par ujagar karne ke azm ki akkasi karta hai.

Tasveer: Bashukriya DG PR Balochistan