Sohbatpur mein Deputy Commissioner Farida Tareen ki Khuli Kachehri; kai shikayat par mauqe par ehkamat

Sohbatpur: Chief Minister Balochistan Mir Sarfraz Bugti aur Chief Secretary Balochistan Shakeel Qadir Khan ke ehkamat aur awami masail ke fori hal ki policy ke tahat zila Sohbatpur mein Khuli Kachehri munaqid hui jis ki sadarat Deputy Commissioner Farida Tareen ne ki.

Khuli Kachehri mein zila ke tamam mutaliqa mahkamon ke District Heads, afsaran aur ahalkaron ke alawa zila bhar se awam ki bari tadad shareek hui aur shehriyon ne tehriri o zabani taur par taleem, aman o aman, irrigation, abnoshi, bijli, revenue, sarkon, safai, nikasi-e-aab aur deegar bunyadi masail pesh kiye.

Deputy Commissioner ne sailin ki shikayat tawajjoh aur tahammul se sunin, kai shikayat par mauqe par hi mutaliqa afsaran ko ehkamat jari kiye jabke deegar masail ke hal ke liye mahkamon ko wazeh hidayat di gayin.

Farida Tareen ne kaha ke Khuli Kachehri ka bunyadi maqsad awam aur intizamiya ke darmiyan barah-e-raast rabta mazboot banana aur shehriyon ko muassir platform faraham karna hai. Zilai intizamiya har waqt awam ki khidmat ke liye dastiyab hai aur kisi shehri ko jaiz masle ke hal ke liye ghair zaroori mushkilat ka samna nahin karna parega. Unhon ne hidayat ki ke awami shikayat ko kaghazi karrwai tak mehdood na rakha jaye balke amli iqdamat kar ke sailin ko barwaqt relief diya jaye.

Unhon ne kaha ke hukumat Balochistan ki wazeh policy hai ke awami masail tarjihi bunyadon par hal kiye jayen aur sarkari idaron ki karkardagi awami khidmat ke taqazon se hum-ahang ho. Unhon ne yaqeen dilaya ke Khuli Kachehri mein pesh kiye gaye tamam jaiz masail ka izala kiya jaye ga aur pesh raft ki nigrani bhi hogi. Deputy Commissioner ne awam se appeal ki ke woh apne jaiz masail intizamiya ke samne layen aur taawun karen. Ikhtitam par sailin ne masail sunne aur fori ehkamat jari karne ke iqdam ko saraha.

Tasveer: Bashukriya DGPR Balochistan